Rokstu sagataveja: portals lakuga.lv

Tikū Portugalē nūsaslēdzs leluokais pasauļa muzykys forums WOMEX, kurymā jau 17. reizi Latvejis etnomuzykys nūzaris muzikim beja pastateits ari Latvejis stends, kurū organizej Latvejis Muzykys informacejis centrs (LMIC). Nav pagaisuse ari tradiceja eipaši muzykys forumam, sasadorbojūt ar nacionalū īrokstu kompaneju “Skani”, gataveit etniskuos muzykys izlasi “Native Music. Traditional/Folk/World-music Latvia” – tamā vysod ir ari kaids latgaliski skonūšs gobols.

Saleidzynojūt vys ar pārnejā godā izguojušū etniskuos muzykys izlasi, juosoka, ka itūgod ar Latgolu saisteitu skaņdorbu ir cīši moz – viņ diveji i obeji jau dzierdāti itūvosor tradicionaluos kulturys centra “Lauska” izdūtajā etnomuzykys izlasē “Sviests 9”: tī ir apvīneibys “Folk7” dorbs “Vonogu dancs”, kura autors ir Edgars Kārklis, i “TKP (Tā kā pērn)” latgaliski i lībīšu volūdā īdzīduotuo dzīsme “Suņi”, kuru sataisejuši Ēriks Zeps i Julgī Stalte. Sekojūt leidza ari procesim etniskajā i folklorys muzykā latgaliski, juosoka, ka tys vysā obejkivi paruoda, ka itūgod cikom latgaliski dzīdūšī muziki i apvīneibys varbyut i nav cik aktivi, koč nav i tai, ka tradicionaluos muzykys izdavumi itūgod nabyutu izguojuši, bet puornūvadnīki itūreiz sovom programom mozuok izalasejuši latgalīšu dzīšmu. Kūpā izlasē ir 12 dažaidu muziķu, grupu i apvīneibu 20 skaņdorbu, kurī topuši pādejā laikā i veidoj ituo breiža Latvejis etnomuzykys ainu – tī ir kai jau seņ zynomi izpiļdeituoji, tai ari nūsaceiti debitanti: “Saucējas”, “Tautumeitas”, “Iļģi”, “Jōra”, “Auļi”, “Kalnejas”, Katrīna Dimanta, “Very Cool People”, “Zari” i cyti.

Izlasi vysod papyldynoj ari informativs buklets ar muzykys apvīneibu aprokstim, taipat tū kotru godu var uztvert kai taidu ituos šaļts etniskuos muzykys aktualitašu kūpsavylkumu i katalogu. Bukletā ir ari muzykys apvīneibu kontakti, kai ari informaceja par ar tradicionalū muzyku saisteitom organizacejom Latvejā i ari 12 itai muzkys nišai pīdarūšu Latvejis muzykys festivalu saroksts, tymā kai vīneigais nu Latgolys pasaruoda ari Bolvu nūvoda Upītē nūteikūšais storptautyskais folklorys festivals “Lipa kust”.

Itei izlase pasauļa muzykys forumam WOMEX, kurs nūteik jau gondreiž 30 godu i kurymā sasateik tyvai pi treis tyukstūšu muziķu, izdevieju, producentu, muzykys žurnalistu, festivalu organizātuoju i cytu muzykys industrejis puorstuovu nu vysa pasauļa, stendā kolpoj kai Latvejis vizitkarte. Muzykys izlasis koncepcejis autore etnomuzykologe Lauma Bērza par izlasi stuosta: “Muzykys izlasē, kū vadam iz itū forumu, gribim paruodeit Latvejis etniskuos muzykys skotivis aktualitatis. Pādejā dekadē itamā sferā ir bejs daudz eksperimentu, veidojušīs i nūsastyprynuojuši apakšvierzīni. Ir grupys, kas struodoj ilgi i produktivi, ir rodūšī instrumentalisti, kurī sekoj leidza skanis tehnologeju atteisteibai i vaicoj jaunu skaniejumu myusu kūpeigajam montuojumam i jaunradei, kū tys īdvasmoj. Tys ir cīši skaists myusu etniskuos muzykys kūka augšonys process.”

Latvejis etniskuos muzykys izlasi “Native. Music. Traditional/Folk/World-music Latvia” var nūsaklauseit ari muzykys straumiešonys vītnē “Spotify”, bet vaira izzynuot var nacionaluos īrokstu kompanejis “Skani” sātyslopā ITE. Oficialais izlasis izīšonys laiks teik atzeimāts kai pats novembra suokums.