Rokstu sagataveja: portals lakuga.lv

Leivuona stykla i amatnīceibys centrā 18. novembrī 16.00 stuņdēs tiks atkluota izstuode “Stikla sajūta”, viestej publiski daīmamuo informaceja. Izstuodē varēs apsavērt projekta “Stikla sajūta” laikā radeitūs stykla autordorbus, kurūs veiduoja desmit izcyli Baļtejis stykla muokslinīki. Izstuode byus apsaverama nu 18. novembra leidz 6. janvaram.

Nu 2022. gods 15. maja leidz novembram ar Vaļsts Kulturkapitala fonda Latgolys kulturys programys atbolstu Leivuona stykla i amatnīceibys centrā teik realizāts projekts “Stikla sajūta”. Projekta golvonais mierkis ir turpynuot stykla izstruodis tradiceju Leivuonā i popularizēt vīnu nu radzamuokūs Latvejis industrialuo kulturys montuojuma globuotuoju – Leivuona nūvoda pošvaļdeibys Leivuona stykla i amatnīceibys centru. Itymā projektā pīsadaleit tyka uzrunuoti desmit Latvejis i Leitovys stykla muokslinīki i aicynuoti radeit jaunus autordorbus, īsadvasmojūt nu Leivuona stykla izstruodis viesturiskūs tradiceju. Kūpā ar stykla pyutieju Aleksandru Logvinu muokslinīki stykla dorbūs realizēja sovys sajiutys i idejis, īdvasmu meklejūt Leivuona stykla muzeja ekspozicejā. Projekta nūtikšonu muokslinīciski satureigu i vitali svareigu padareja tys, ka tyka īsaisteiti vysaidu paaudžu stykla muokslinīki – Anna Heinsberga Varnase, Ieva Birgele, Baiba Dzenīte, Vineta Groza, kai ari muokslinīki, kas ir struoduojuši i tykuši pi stykla izstruodis pīredzis Leivuona stykla fabrikā, kai Herberts Erbs, Aīda Rotčenkova, Ludmila Safronova, Dainis Gudovskis, Juris Dunovskis, Remigijus Kriukas.

Projekta laikā tyka veiduoti naleli video, izceļūt stykla muokslinīkus kai personeibys i dokumentejūt jūs sajiutys, dorbojūtīs ar styklu. Muokslinīki stuosteja par aicynuojumu īt “stykla ceļu” i pīredzi stykla muokslys nūzarē. Sovpus muokslinīki, kas struoduoja i dorbuojuos Leivuona stykla fabrikā dalejuos atmiņuos par muokslinīka –dizainera nūzeimi stykla ražuošonys procesa veiduošonā i izstruoduojumu izstruodē.

Projekta “Stikla sajūta” kūpradis sinergejis rezultatā mejuos pīredze i dūmu liduojums, stykla sajiuta i virtuoza meistareiba. Jaunradeitī autordorbi papyldynuos Leivuona stykla i amatnīceibys centra kruojumu i byus turpynuojums myusu dīnu stykla muokslys kolekcejis izveidei.