Rokstu sagataveja: portals lakuga.lv

Rēzeknis piļsātā nu jau kaidu laiku ir daīmami vairuoki audio gidi, kuri veļteiti atseviškom temom i laikmatim. Da ituo audio gidi ir sevi pīruodejuši kai lobu paleigleidzekli piļsātvidis īpazeišonai, deļtam Rēzeknis Turisma atteisteibys centrs niu ir izveiduojs jaunus audio stuostus, kas ar sovu daīmameibu i īkļautū informaceju atsaškir nu jau asūšuo pīduovuojuma. Tūs var nūsaklauseit ari latgaliski.

Ir izveiduoti 11 stuostejumi par svareiguokajim objektim Rēzeknē, kuri atspīgeļoj piļsātys viesturi i nūtykumus, kas ar tū saisteiti. Jaunūs audio gidu vydā atrūnami stuosti par īvāruojamuokajom piļsātys bazneicom, pīmineklim, kai ari par piļsātnīkim nūzeimeigom i meilom vītom, pīmāram, Leščinska vacūs patmaļu apleicīni.

Kai stuosta Rēzeknis Turisma atteisteibys centra puorstuove Elīna Pastare, pi kotra nu objektu, par kuru izveiduots stuostejums, atsarūn stends, iz kura radzami QR aba kvadratkodi, kurus nūskenejūt ar sovu vīdīreici, automatiski īsaluodēs jauna tīšsaistis lopa iz attīceigajā volūdā izveiduotū audio gidu. Gona svareigi, ka audio gidus var izmontuot sevkurs interesents i nav vajadzeibys īluodeit atseviškys telepona aplikacejis, partū ka audio gidi ir breivi daīmami piļsātys portalā rezekne.lv sadaļā “Turisms”.

Itūšaļt audio gidi ir izveiduoti četruos volūduos: latvīšu, angļu, krīvu i latgalīšu. Elīna Pastare ari pastreipoj: “Ir eipašs gandarejums, ka piļsātā pyrmū reizi ir izveiduots audio gids latgaliski, tei ir kai duovona vītejim i breineiga “ūdzeņa” piļsātys gostim, kuri atbraucūt nūviertej ari unikalū latgalīšu volūdu.” Juopīzeimej, ka itūšaļt Rēzekne ir vīneiguo vīta Latgolā, kur ir taida veida audio gids latgaliski.