Rokstu sagataveja: portals lakuga.lv

Vaļsts izgleiteibys satura centra (VISC) eistynuotuo projekta “Kompetenču pieeja mācību saturā” (Skola2030) mierkis ir izstruoduot, aprobēt i piecteceigi īvīst Latvejā taidu vyspuorejuos izgleiteibys saturu i pīeju vuiceibom vacumā nu pyrmsškolys godu leidz vydsškolai, kura rezultatā školāni īsavuiceitu myusu dīnu dzeivei napīcīšamuos zynuošonys i prasmis. Projekta gaitā tyka veikta asūšuo vuiceibu satura puorsavieršona i pylnveide. Škārsteikla portals tavaklase.lv ir vīna nu “Skola2023” projekta daļu, i tamā daīmami ari vuiceibu materiali latgaliski.

Tavaklase.lv ir izgleitojūša vītne školuotuojim i školānim, kur atrūnami ar vuiceibu procesu saisteiti video pamatprīškmatūs pamatizgleiteibā i pamatkursūs videjuos izgleiteibys pakuopē, prūti, video saturs ir veiduots 1.–9. klasis školānu i vydškolānu vuiceibu programom septeņuos vuiceibu jūmuos ar vaira nakai 1000 tematu. Projekta gaitā VISC izsludynuoja konkursus, kur sevkurs ar atbylstūšu pīredzi varēja pīsasaceit i veiduot vuiceibu materialus. Deļtam vysus vuiceibu video ir veiduojuši jūmys profesionali i školuotuoji praktiki nu vysys Latvejis.

Tavaklase.lv golvonais mierkis ir byut par paleigleidzekli i resursu kai školuotuojim, tai školānim vuiceibu procesā. Tai kai itys resurss ir daīmams tīšsaistē i var byut lejupīluodejams sevkurā laikā, tys ir vīglai integrejams i izmontojams školuotuoju dorbā ar školānim ceļā iz myusdīneiguoku i digitalim resursim boguotuoku vuiceibu pīeju, kas myusu dīnu školānim ir saistūšuoka.

Portalā tavaklase.lv ir daīmami ari vuiceibu materiali latgaliski – video i informaceja par dažaidim papyldu materialim, kurus var izmontuot vuiceibu prīškmatā “Latgaliešu rakstu valoda”. Pīmāram, video par rokstu volūdys rasšonūs, video par latgalīšu volūdys statusu, ari taidys temys, kai Ontona i Annys dīnys i myusu dīnu latgalīšu muzyka, kuru apvuiceibai tyka pīaicynuoti papyldu gosti, kai Annele Slišāne, Guntis i Kristaps Rasimi, Veronika Dundure i cyti.

Portala video materialus latgaliski pamatā veiduoja Ilga Šuplinska. Vaicuota par materialu izveidis procesu, jei skaidroj: “Es pīsateiču 2021. gods pavasarī. Materialu veiduošona ilga nu 2022. goda janvara da juļam. Kūpā ir sataiseiti ostoni video par nūvodvuiceibu, kurus vodu es, tod ir sešys latgalīšu volūdys stuņdis kūpā ar Līgu Rundāni i Kristapu Rasimu, kas paradzātys pamatškolai. Vēļ ir div metodiskī materiali par digitalajim resursim, kurus var izmontuot latgalīšu volūdys voi nūvodvuiceibys procesā i vēļ 21 video materials, kur centrā ir konceptu pīeja.” Ilga Šuplinska ar nūžālu pīzeist, ka, cik itūšaļt zynoms, nivīns vaira nav pīsateics latgaliskuo satura izveidei.

Juodasoka, ka itys portals ir īkļauts Ekonomiskuos sadarbeibys i atteisteibys organizacejis (OECD) pasauļa lobuokūs rysynuojumu vydā izgleiteibys nūdrūsynuošonai Covid-19 pandemejis laikā.

Video par latgaliskū škārsteiklā, kur teik runuots ari par latgalīšu kulturys ziņu portalu lakuga.lv.