Kulturys īsacejumi svātku nedeļai: parade, gatavuošona dobā i tyvuokūs izzynuošona
Rokstu sagatveja: portals lakuga.lv
Laiku nu 11. da 18. novembra Latvejā īrosts aizvadeit vaļsts svātku patriotiskajuos nūskaņuos, deļtuo itamā nedeļā sovus īsacejumus, kai pīdzeivuot svātkus i Latvejis sajiutu, īsoka Juoņs Tjaguns, NBS Štaba bataļjona Gūdasardzis rūtys instruktors, kurs dzims i izaudzs Bolvu pusē, nu itūšaļt par sovu sātu sauc Reigu.
Kūpā byušona vaļsts svātkūs
Svātku nedeļā nūteikti īsoku aizīt iz kaidu nu Latvejis Republikys proklamiešonys dīnai veļteitūs nūtikšonu, par pīmāru, 18. novembra militarū paradi Reigā, kur ar eipašom sajiutom pīsadaleišu ari es, jo Štaba bataļjona Gūdasardzis rūta ītugod svietej 30 godu jubileju nu laika, kod atjaunuoja tuos viesturiskuos funkcejis. Ka naīsadūd byut golvyspiļsātā, tod nūbraucit iz pasuokumim, kas tyvuok pi jiusu sātys – tai varēs sajust kūpā byušonu vaļsts svātkūs!
Ēst gatavuošona dobā
Vīna nu munu sirdslītu ir ēst gatavuošona dobā. Īsoku svātkūs atrast receptu gruomotuos kaidu pyrma tuo nikod nataiseitu latgalīšu iedīni, izavēlēt meilu vītu dobā, paaicynuot sovus draugus voi rodus i tai, gatavojūt ēst, izbaudeit ari taidu kūpā byušonu.
Tyvuokūs vītu i cylvāku izzynuošona
Latgola maņ vysod asociejusēs ar sovu dobu – lelajim azarim, mīru i sātys sajiutu, kuru tei roda, nu bīži saīt, ka mes vysu mozuok zynim par vītom, kurys mums ir vysu tyvuok. Īsoku svātku nedeļu izmontuot ari tam, kab tyvuok īpazeitu kai apleicejūs dobys objektus, tai sova cīma voi piļsātys viesturi, ari sovys dzimtys saknis. Taišni tymsī rudiņa vokori ir breineigi tam, kab nasasteidzūt apsarunuotu ar tyvajim.
