Nūtiks izdavuma “Trusīni vessim reitā pi puiša” attaiseišonys svātki

Nūtiks izdavuma “Trusīni vessim reitā pi puiša” attaiseišonys svātki

Rokstu sagataveja: portals lakuga.lv

Svātdiņ, 27. novembrī, divejuos stuņdēs piec pušdīnu Lūznovys muižā nūtiks Vinsenta Flikigera zeimiejumu i Edeitis Husaris eisūs stuostu gruomatenis “Trusīni vessim reitā pi puiša” attaiseišonys svātki. Izdavumā, kurys izdeviejs ir latgalīšu kulturys kusteiba “Volūda” (bīdreiba “LgSC”), apkūpuoti šveicīšu muokslinīka Latgolys īdvasmuoti zeimiejumi i tim veļteitī stuosti par Latgolys kasdīnu i lītom, kū niu vēļ pīdzeivojam, nu vysā tycams, ka apstuokli napasameis, dreiži vaira napīdzeivuosim. “Trusīni vessim reitā pi puiša” 20 stuosti publicāti trejuos volūduos – latgalīšu, angļu i vuocu.

Izdavuma “Trusīni vessim reitā pi puiša” idejis autors ir šveicīšu muokslinīks i muzikis Vinsents Flikigers (Vincent Flückiger), kurs jau vaira nakai desmit godu regulari gastej Latvejā, Latgolā, jādz latvīšu volūdu i ceņteigi vuicās latgalīšu volūdu. Muokslinīks dorbojās pasauļa teikla grupā “Urban Sketchers”, kurymā apsavīnuojuši zeimātuoji, kas paruoda vidi sev apleik viņ mirkļa īspaidā i tūs spylgtajā dažaideibā. 2015. godā Leivuonā, Rēzeknē i Daugovpiļs nūvodā, kai ari Čehejā i 2022. goda vosorā Lūznovā beja apsaverama muokslinīka zeimiejumu sereja “Latgale laiku ritā”, kurymā paruodeita lauku dzeive Latgolā – šaļtenis nu sadzeivis ar tradicionaluo kulturys montuojuma i Latgolys kasdīnys īmyužynuošonu, kuruos pīdzeivuotys diveju nedeļu garumā.

Karteņā: vīns nu gruomotys zeimiejumim i tuo prototips, foto Edeite Husare

Ituo izdavuma ideja – apvīnuot eisus i kūduleigus stuosteņus, kuru radeišonys izaicynuojumam ļuovusēs Edeite Husare, ar Vinsenta zeimiejumim, rodūt sajiutu par Latgolys šudiņdīnu. Edeite atzeist, ka tekstu radeišona gotovim zeimiejumim jai bejuse izaicynuojums, jo, koč ari kasdīna saisteita ar raksteišonu i latgalīšu volūdu, literaru dorbu tapšonai vajadzeiga cyta sajiuta i raksteišonys veids. Izdavumā “Trusīni vessim reitā pi puiša” sasateik stuosti kai nu Edeitis, tai Vinsenta Latgolys pīredzis – tūs navar saukt par autobiografiskim, koč ari tymūs ir pamatā dzeivē pīradzātys nūtikšonys, kas gon itūreiz dabuojušys jaunus “nūsacejumus” i stuostus. Stuosteņu golvonuo dūma ir ar pasmaideišonu, puordūmom voi vīnkuoršu fiksaceju īmyužynuot tūs kulturviesturis voi vīnkuorši dzeivis faktus, kas myusdīnu Latgolā ir kasdīna, nu daudzūs gadīņūs dreiži nu tuos var ari pagaist, pīmāram, dzīduošona pi krystu voi pīna goldi ceļa moluos.

Izdavuma redaktore ir myusdīnu spylgtuokuo latgalīšu literate Ilze Sperga, bet muokslineica Daina Salmiņa. Kab dzeivi Latgolā vaira saprastu ari cytur, Vinsenta ideja beja tū raudzeit puortulkuot cytuos volūduos, deļtuo vysi stuosti skaitomi ari angliski i vuociski. Angļu volūdys tulkuojumu taisejs Džeids Vils (Jayde Will), kurs bejs idejis autors i tulkuotuojs ari angliski-latgaliski izguojušajam latgalīšu autoru – Raibuo, Ligijis Purinašys i Ingridys Tāraudys – dzejis kūpkruojumam “Pādejais modeļs” (The Last Model), kurū 2020. goda rudinī izdeve Londonys izdevnīceiba „Francis Boutle Publishers”, bet vuocu volūdys verseju taisejuse Nikole Naua (Nicole Nau) – tulkuotuoja i volūdneica, latvīšu volūdys profesore Poznanis Oduma Mickeviča universitatē, gruomotys “A short grammar of Latgalian” autore, iz vuocu volūdu tulkuojuse Mārys Zālītis i Nuorys Ikstenys dorbus, kai ari breivajā laikā pa reizei iztulkoj vuociski kaidu latgalīšu dorbu.

Stuostu gruomotys “Trusīni vessim reitā pi puiša”, kas simboliski ari formata ziņā byus kai postkarte nu myusu laiku Latgolys, atkluošonā 27. novembrī 14.00 varēs sasatikt ar izdavuma autorim, pīdzeivuot Teilānu kapelys muzykalū kluotyn byušonu, kai ari izzynuot stuostu rasšonuos “aizkulisis”. Bet piec prezentacejis grybātuojim ir vareiba palikt iz Latvejis-Šveicis muziķu kūpprojekta “Magnetic Bach” koncertprogrammu “Unexpected”, kurā pīsadola Aija Veismane (bolss), Ilze Grudule (baroka čells), Vinsents Flikigers (sempli, elektronika),  Žoslens Rafanels (dzīdūšuos bļūdys, zvoni, elektronika), kai ari eipašais gosts – multimuokslinīks i komponists Ugis Prauliņš (sintezators, elektronika). Izdavuma “Trusīni vessim reitā pi puiša” attaiseišonā īīšona ir bezmoksys, nu koncerta beletus var nūpierkt “Biļešu Paradīze” biļešu sistemā, kai ari iz vītys Lūznovys muižā.

Gruomotys izīšona beja īspiejama ar Latgolys kulturys programys paleigu, kū eistynoj Latgolys regiona atteisteibys agentura ar Vaļsts kulturkapitala fonda un A/S “Latvijas valsts meži” atbolstu. Izdavumu var jau aiz laika pasyuteit latgalīšu kulturys kusteibys “Volūda” zīduošonys platformā-veikalā voluda.lv. Taipat izdavumam daīmama ari video verseja, kurā stuostu autore skaita vysus gruomotā publicātūs stuostus.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]