Sarunys ar Gunāru Igauni, Inesi Mičuli i cytim jaunajā žurnala “A12” numerī
Rokstu sagataveja: portals lakuga.lv
Izguojs žurnala “A12” decembra/janvara numers, kurā var puorskaiteit sarunys ar muzykantu i muzeja izveiduotuoju Gunāru Igauni, školuotuoju Sandru Justi, režisori Inesi Mičuli, Zīmeļlatgolys dzīšmu apkūpuotuoju Evitu Zarembu-Krīgeri, tekstilmuokslineicu Ilonu Linarti-Ružu i cytim.
Žurnala “A12”, kas ir vīneigais Latgolys žurnals, redaktore Ināra Groce svātku laikā soka: “Tuos skaistuoskuos duovonys Zīmyssvātkūs i ari kasdīnā ir viereiba i kūpā byušona ar tyvynīkim, draugim i pošam ar sevi. Kab dūmys atsateirej i ir drūsme byut, kab puorlīceiba par lobuo uzvaru jem viersrūku! Žurnals ir lobs ceļabīdrys ituos attīksmis radeišonā.”
Žurnala “A12” decembra/janvara numerī skaitit:
- kaida ir Nikodema Rancāna bolvys laureate školuotuoja Sandra Juste juos školānu skatejumā, i kaids ir Sandrys skatejums par pedagogejis byuteibu i školuotuoja miseju;
- cylvāks, kurs dag par sovu dorbu, idejom, saimi i Latgolu – Gunārs Igaunis;
- par kruosom cylvāku dzeivē i vierteibom, kas myus vīnoj – Ilona Linarte-Ruža;
- Daugovpiļs urbanonimi laiku lūkūs Ivara Matisova pietejuma rokstā;
- Latgolai naīrosti – sīvīte kapelans, saruna ar Judīti Zusmani;
- režisoris Inesis Mičulis horizonti;
- atškireigais latgalīšu dejā – Deju svātku viersvadeituoja Ilmāra Dreļa redzīņs;
- ar skumem var pasaceit vaira – Osvaldu Zvejsaļnīku pīmynūt…
- Latgolys muzeju izstuožu, jaunūs latgalīšu gruomotu i muzykys izdavumu apskots i cyti stuosti.
Kai īrosts žurnalā “A12” puorskaitoma ari portala lakuga.lv sagataveituo informaceja par jaunumim latgaliskūs gruomotu i muzykys izdavumu laukā, kai ari vysu rokstu vydā ari portala lakuga.lv redakcejis taiseitī stuosti – ar režisori Inesi Mičuli i tūpūšuos gruomotys par Abrini veiduotuoju Lindu Vorpi sasarunuoja lakuga.lv redaktore Laura Melne.
Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Kab atbaļsteitu žurnala byušonu ari iz prīšku, aicynoja abonēt tū 2023. godam. Jaunuokū žurnala numeri var nūpierkt (kai digitalā, tai taustomā veidā) ite: a12.lv.
