Izdūta šveicīša zeimiejumu i latgalītis stuostu gruomota par Latgolu (+FOTO)

Izdūta šveicīša zeimiejumu i latgalītis stuostu gruomota par Latgolu (+FOTO)

Rokstu sagataveja: portals lakuga.lv

Novembra beiguos Lūznovys muižā attaiseišonys svātkus pīdzeivuoja Vinsenta Flikigera zeimiejumu i Edeitis Husaris eisūs stuostu gruomateņa “Trusīni vessim reitā pi puiša”. Gruomotā apkūpuoti šveicīšu muokslinīka Latgolys īdvasmuoti zeimiejumi i tim veļteitī stuosti par Latgolu, aizdūdūt vaicuojumu, kas regionā ir tys, kas pīsaista cyttautīša skotu, bet vītejim līk dūmuot, kas nu ituo laika paliks tuoļuokajam. Gruomotā puorskaitomī stuosti publicāti trejuos volūduos – latgaliski ar tulkuojumim angliski i vuociski.

Izdavuma “Trusīni vessim reitā pi puiša” idejis autors ir šveicīšu muokslinīks i muzikis Vinsents Flikigers (Vincent Flückiger). Jis, pasasokūt dzeivisbīdrei, latvīšu čellistei Ilzei Grudulei, jau daudzus godus regulari gastej Latvejā, Latgolā, jādz latvīšu volūdu i vuicās latgalīšu. Dorbojūtīs pasauļa muokslinīku teiklā “Urban Sketchers”, Vinsents regulari fiksej vidi sev apleik – tai 2015. godā roduos zeimiejumu sereja “Latgale laiku ritā”, kurā pamatā īmyužynuota Stiernīnis apleicīne. Kab zeimiejumus papyldynuotu ar koč kū teksta formatā, Vinsents uzrunuojs latgalīšu kulturys aktivisti, portala lakuga.lv vadeituoju Edeiti Husari, kurei, īsadvesmojūt nu muokslinīka dorbu, pīrakstejuse 20 eisus i kūdūleigus stuosteņus par Latgolys šudiņdīnu.

Gruomotys atkluošonā Lūznovys muižā kluotyn beja kai obeji izdavuma autori, tai ari jūs rodi, draugi, kolegi i cyti interesenti. Iz vītys beja vareiba dzierdēt “aizkulišu” stuostus par tū, kas īdvesmuojs zeimiejumu rasšonūs i kai nu tūs piečuok topuši stuosti, kurūs sasavej drupeit autobiografisku nūtikšonu nu obeju gruomotys autoru dzeivis, dažaiduo Latgolys pīredze i ari kaidys izdūmuotys situacejis. Izdavumā publicātūs stuosteņu golvonuo dūma ir radeit sova veida postkartis par Latgolu, kuruos ar pasmaideišonu, puordūmom voi vīnkuoršu fiksaceju īmyužynuot tūs kulturviesturis voi vīnkuorši dzeivis faktus, kas myusdīnu Latgolā ir kasdīna, nu daudzūs gadīņūs dreiži nu tuos var ari pagaist, pīmāram, dzīduošona pi krystu, pīna goldi ceļa moluos i cytys. “Trusīni vessim reitā pi puiša” attaiseišonā ar dzīsmem prīcēja ari Teilānu kapela, kurā apsavīnuojuši Vinsents, juo dzeivisbīdre Ilze i cyti Gruduļu saimis puorstuovi i draugi.

Izdavuma redaktore ir latgalīšu literate Ilze Sperga, bet muokslineica – Daina Salmiņa. Stuostus angļu i vuocu volūduos tulkuojuši platformys “Latvian Literature” tulkuotuoji, kurim obejim itys nav pyrmais dorbs ar latgaliski rokstūšim autorim – angļu volūdys tulkuojumu taisejs Džeids Vils (Jayde Will), bet vuocu volūdys Nikole Naua (Nicole Nau).

Jaunū izdavumu, kuru sagatavejuse latgalīšu kulturys kusteiba “Volūda” (bīdreiba “LgSC”), var nūpierkt kusteibys “Volūda” zīduošonys platformā-veikalā voluda.lv, škārsteikla veikalā taiseitslatgola.lv, “Jānis Roze” gruomatneicuos i škārsteikla veikalā, Lūznovys muižā, kai ari dreiži byus daīmama cytur Latgolā. Taipat izdavumam daīmama ari video verseja, kurā stuostu autore skaita vysus gruomotā publicātūs stuostus. Tū bez moksys var nūsaklauseit ite https://ej.uz/trusine.

Gruomotys izīšona beja īspiejama ar Latgolys kulturys programys paleigu, kū eistynoj Latgolys regiona atteisteibys agentura ar Vaļsts kulturkapitala fonda un A/S “Latvijas valsts meži” atbolstu.

Galerejā īsavieršona “Trusīni vessim reitā pi puiša” attaiseišonā, foto i video autore Dagnija Bernāne/Lūznovys muiža.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]