Rokstu sagataveja: portals lakuga.lv

Apvīneiba “Latgalīšu reps” tikū izdavuse jaunu dzīsmi “Pādejuo pītura”, kurei kotram ļaus aizadūmuot, kas atsarūn dzeivis pūsmā, kod ir juopījem lāmums, kur spert tuoļuokū sūli. Dzīsmei publicāts ari videoklips, viestej apvīneibys puorstuovu atsyuteituo informaceja.

Dzīsmis “Pādejuo pītura” videoklipa idejis autori ir pošai grupys daleibnīki, sasadorbojūt ar operatoru i montažys režisoru Jāni Jēkabsonu. Dzīsmē pīsadola obeji apvīneibys “Latgalīšu reps” daleibnīki – Ivo Grigalis i Didzis Kozlovs, bet tuos apstruodi taisejs Jānis Šmediņš (PrimeTime Latvia).

“Latgalīšu reps” stuosta, ka dzīsme “Pādejuo pītura” viestej par tū, kai mes kotrys kaidā nu dzeivis pūsmu sasaduram ar nūtikšonom, kas līk apsastuot i pījimt lāmumu – īt iz prīšku voi palikt iz vītys.