Rokstu sagataveja: portals lakuga.lv

Rēzeknis Muokslys i dizaina vydsškola i Latvejis Muokslys akademejis Latgolys filiale sadarbeibā ar bīdreibu “Austrumlatvijas radošo iniciatīvu centrs” organizej pyrmsssvātku labdareibys tiergu Rēzeknis jaunūs muokslys talantu atbolstam. Pasuokuma nūtikšonys vīta – taišni sūpluok īīšonai lelajā tiergā, Latgolys īlā 71, Rēzeknē. Īsavērt jaunūs muokslinīku dorbūs var Facebook lopā ITE.

Muokslys tiergā nu 21. leidz 24. decembrim vēļ nabejušā pop-up formata izpuordūšonā i izsolē sevkuram byus vareiba par zīduojumim īsaguoduot jaunūs muokslinīku dorbus. Iz reizis piec pasuokuma svineiguos atkluošonys 21. decembrī 18 stuņdēs, byus ari diskuseja “Bazars par muokslu”, kurā pīsadaleis Rēzeknis muokslys izgleiteibys īstuožu audziekni, pošvaļdeibys, kulturys i vītejūs uzjāmumu puorstuovi, kab diskutēt par muokslys školys i akademejis filialis lūmu Rēzeknis piļsātā i uzjiemiejdarbeibā.

22. decembrī 18 stuņdēs nūtiks īprīšk izvālātu, eipašu muokslys dorbu izsūle. Pasuokums svineigi nūsaslēgs 24. decmebrī 16 stuņdēs, kod atbylstūši pasuokuma labdareibys mierkim atbaļsteit jaunūs muokslinīkus jūs talanta atteisteibai, vysi par jaunīšu dorbim sajimtī zīduojumi tiks pi pošu muokslinīku.

Kai stuosta vīns nu idejis autorim Raimonds Platacis: “Pasnādzūt Muokslys akademejis Latgolys filialē, maņ beja sajiuta, ka piļsāta i škola dzeivoj div paralelys dzeivis. Es redzieju, kai školuotoji dag par sovim audzieknim, i cik vydsškolā i akademejā ir daudz talanteigu un motivātu jaunīšu, kas roda breineigys lītys. Izrunuojom īškeji i nūlēmem eistynuot jaunūs Rēzeknis muokslinīku tiergu, kurā tod studenti paruodeitu piļsātnīkim sovus lobuokūs dorbus i vēļ nūpeļneitu.”

Raimonds ari papyldynoj: “Paraleli tierdzeņam byus diskuseja “Bazars par muokslu”, kur mes runuosim par tū, kai jaunim muokslinīkim paruodeit sevi piļsātā voi uzjiemiejdarbeibā. Ceļsim augšā tematus, kas jau godim nav runuoti un apsprīssim īspiejis iz prīšku i sadarbeibys formatus.”

Dabuot sovā eipašumā muokslys dorbus, nanūviertejamys i naradzātys Zīmyssvātku duovonys, byus vareiba viņ par skaidrys naudys zīduojumim. Rēzeknis jaunī muokslinīki aicynoj gods tymsuokajuos dīnuos dzert čaju, “dasadurūt” vēļ naskortajai muokslai, i tai izalaist muokslys radeitajā syltumā.

Labdareibys muokslys tierga dorbalaiks:
21. decembrī nu 18 da 20.30 stuņžu;
22. decembrī nu 16 da 19 stuņžu;
23. decembrī nu 10 da 19 stuņžu;
24. decembrī nu 10 da 17 stuņžu.

Pasuokuma organizatori soka paļdis atbaļsteituojim, bez kuru pasuokums nabyutu īspejams: SIA “Santeko”, AS “Latvijas finieris”, SIA „ALBA-LTD”, SIA “BAIBIŅA”, SIA “Vilards”, SIA “00000000”, Alvim Berngardam, Raimondam Platacim, Evelīnai Elksnītei, Mārim Igavenam.

Biļdis nu pasuokuma svineiguos atkluošonys 21. decembrī, foto Amanda Anusāne.