10 dzīsmis ap Zīmyssvātkim latgaliski

10 dzīsmis ap Zīmyssvātkim latgaliski

Rokstu sagataveja: portals lakuga.lv

Latgalīšu kulturys ziņu portals lakuga.lv ar dažaidom tematiskajom izlasem turpynoj pīvērst viereibu latgalīšu muzykys dažaideibai. Zīmyssvātku nedeļā pīduovojam nūsaklauseit svātkim veļteitūs dzīšmu izlasi, kurā kai īrosts – kai jaunuokys, tai i senejuokys vysaižu žanru i izpiļdeituoju dzīsmis.

1. Bungu i kuliņu grupa “Auļi” i Asnate Rancāne – TEC, PELEITE, ZIERŅU ZOGTU

Dzīsme nu bungu i kuliņu grupys “Auļi” jaunuokuo albuma “Ķekatās”, kurā kai gaška pīsadola ari grupys “Tautumeitas” dzīduotuoja Asnate Rancāne.

2. Grupa “Dabasu Durovys” i Laura Svikša – ZĪMYS SVĀTKU NAKTS

Grupa “Dabasu durovys” itūgod publiciejuse Zīmyssvātku dzīsmi “Zīmys svātku nakts”, kas īraksteita kūpā ar jaunū dzīduotuoju Lauru Svikšu. Dzīsmis vuordu autors ir Ontons Skrynda, bet muzykys – Aņss Ataols Bierzeņš. Vaira par dzīsmi ITE.

3. Ilža – ZĪMYSSVĀTKI ČETRI BRUOLI

Dzīsme nu Ciblys folklorys kūpys “Ilža” ūtruo albuma “Ilža rūtoj, kaladoj”(2011), kurā folklorys kūpa dzīd i spieļoj Leldīnis, Juoņa dīnys i Zīmyssvātku dzīsmis.

4. Rēzeknis nūvoda vokaluo studeja “Skonai” – PI EGLEITIS

Rēzeknis nūvoda vokaluos studejis “Skonai” jaunuokuos grupys dzīsme “Pi egleitis” nu 2017. godā izguojušuo albuma “Rūtaļa”, kas veļteits dzejnīka Ontona Slišāna pīmiņai. Dzīsmis muzykys autore ir studejis vadeituoja Guntra Kuzmina-Jukna, bet vuordu autors – Ontons Slišāns.

5. Grupa “Laiksne” – SVĀTKI GUOJA

Dzīsme nu grupys “Laiksne” albuma “Es čigāna meita biju”, kurs izguoja 2013. godā, gūdynojūt ari grupys 20 godu darbeibys jubileju. Dzīsmē pasaruoda vīna nu eipaši Latgolā rakstureigūs Zīmyssvātku laika tradiceju – čyguonūs īšona.

6. Pankroka apvīneiba “Yann & Latgalians” – ZĪMYSSVĀTKU LAIKS

Latgalīšu/franču pankroka apvīneibys “Yann & Latgalians” vīns nu Zīmyssvātku hitu. Sovulaik treis godus piec kuortys apvīneiba nu Daugovpiļs izdeve eipašūs Zīmyssvātku hitus. 2013. godā izguoja da ituo pādejuo dzīsme “Rezervis Zīmyssvātki”, sūlejūt, ka carams piec četru godu ap Zīmyssvātkim byus gaidoma tūre pa Daugovpiļs, Reigys i Līpuojis klubim, prezentejūt debeja albumu “Panku Zīmyssvātki”. Godi paguojuši, bet ar debejis albumu apvīneibai vyss vēļ prīškā. Bet vēļ arviņ nūsaklauseit var pyrmū nu “Yann & Latgalians” Zīmyssvātku hitu – “Zīmyssvātku laiks”.

7. Postfolklorys grupa “Rikši” – VYLKS AR KOZU

Dzīsme nu grupys albuma “Trīp!” (2020), dzieržamys Rēzeknis pusis godskuortu īražu dzīsmis grupys dalinīku aranžejuos.

8. Apvīneiba “Jezups i Muosys” – ZĪMYSSVĀTKI

Apvīneibys “Jezups i Muosys” svātku laika hits “Zīmyssvātki” nu kasgadejuo debejis albuma “LAI SLAVA JAM!”. Projekts par albumu “LAI SLAVA JAM!” sajiems Latgalīšu kulturys goda bolvu “Boņuks 2016” par snāgumu alternativajā muzykā.

9. Folklorys draugu kūpa “Vīteri” – ATĪDAMI ZĪMASSVĀTKI

Folklorys draugu kūpys “Vīteri” dzīsme i video nu 2011. godā izguojušuo albuma “Samovars”.

10. Folklorys kūpa “Saime” – JEZUS BIERNEŅS PĪDZIMS IRA

Dzīsme nu albuma “Dzīsmis ap Dīva Pīdzimšonu” (īraksteits 2014. godā). Albumā atrūnamys 14 senejuos katuoļu Zīmyssvātku dzīsmis, kuruos īdzīduojuse Vactiļžys pogosta folklorys kūpa “Saime”. Albuma idejis autors i izdeviejs bazneickungs Aigars Bernāns par īrokstu soka: “Nu aizmiersteibys asam cāluši senejus vuordus i bolsus, kū modernais pasauļs jau ir aizmierss. Myusu vacī ļauds juos zynuoja iz pruota i Zīmyssvātku laikā dzīduoja na tik Latgolys bazneicuos, a i sātā voi īdami cyts iz cytu gostūs kaladuot. Vairuokuos paaudzēs ituos Zīmyssvātku dzīsmis Latgolys katuolim beja vīneiguos, cikom 20. godu symta 30. godūs pasaruodeja jaunuokys, kuo melodejis niu pazeist vysa Rītumeiropa i vēļ tuoļuok. Vacuos bazneicys dzīsmis ap Dīva Pīdzimšonu tyka napeļneiti aizmierstys. Patīseibā juos ir unikala vierteiba, kas latgalīšūs veiduoja pīdareibys sajiutu na tikai Dīvam, Bazneicai, sovai saimei, a i myusu Latgolai.”

Ka zynit vēļ kaidys dzīsmis, kurys vajadzātu īkļaut izlasē, drūsai rokstit komentarūs ite, portalā, voi lakuga.lv socialūs teiklu profilūs Facebook, Instagram i Twitter.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]