Folklorys kūpa “Upīte” Zīmyssvātkūs duovoj jaunu klipu

Folklorys kūpa “Upīte” Zīmyssvātkūs duovoj jaunu klipu

Rokstu sagataveja: portals lakuga.lv

Folklorys kūpa “Upīte” klauseituojim duovoj muzykys klipu Zīmyssvātku nūskaņuos – par ceļu, seve mekliešonu, škieršlim i izvielem, golvonuo nu kurūs ir – nest gaismu i pošim byut par gaismu, nasaverūt iz vysa, kū pīdzeivojam kai kasdīnys realejuos, tai pasauļa nūtikšonu kontekstā, informej Namaterialuos kulturys montuojuma centra “Upīte” direktors Andris Slišāns.

Klips radeits kai turpynuojums video klipu serejai folklorys kūpys albuma “Padzīdam i…” dzīsmem, i itūreiz tyka stuosteits dzīsmis “Sabarovu kumelini” stuosts. Dzīsmis aranžejis autori ir Kate Slišāne, Domeniks Slišāns i Artūrs Slišāns.

Klipā, taipat kai dzīsmē, etniskais i tautyskais sasateik ar urbanū, bāgūt, sasavīnojūt i gols golā papyldynojūt vīns ūtru. Par fiļmiešonys vītu tyka izvālāta Kuprovys bejušuo ryupneicys teritoreja, kas simboliski īsader vacūs laiku montuojuma i myusu dīnu savīnuojumā.

Klipa driebu i idejis autore ir multimuokslineica Evika Muizniece, sadarbeibā ar kuru radeiti ari īprīškejī folklorys kūpys “Upīte” muzykys klipi.

Audiovizualais dorbs sataiseits ar Vaļsts kulturkapitala fonda atbolstu, i tuo golvonī mierki ir radeit jaunu, myusdīneigu interpretaceju par latgalīšu tradicionalū muzyku folklorys kūpys “Upīte” izpiļdejumā i popularizēt tradicionalū muzyku myusdīneigā skaniejumā jaunīšu vydā, sekmejūt interesi par nematerialū montuojumu i latgalīšu volūdu.

Kai pastreipoj Namaterialuos kulturys montuojuma centra “Upīte” vadeituojs Andris Slišāns: ”Prīca, ka mozim sūlim folklorys kūpa “Upīte” tyvojās nūspraustajam mierkam izveiduot veiru dzīšmu albuma “Padzīdam i…” video stuostu. Itys jau ir sastais muzykys klips, vēļ atlykušys tik vīnpadsmit dzīsmis i tod jau varēs izbaudeit kūpejū albuma stuostu.”

Videoklipa idejis autore i producente ir Evika Muizniece, operators i montažysts – Artūrs Krūmiņš. Klipa veiduošonā pīsadaleja myusu dīnu deju doncuotuoji Jana Bondare i Reinis Sondors, tautys deju horeografe Anda Sprūža. Video pīsadaleja: Andris Slišāns, Ligita Spridzāne, Kate Slišāne, Domeniks Slišāns, Kaspars Babāns, Viktorija Supe, Mareks Supe, Nataļja Putniņa i Edgars Jermacāns.

Print Friendly, PDF & Email

Kalenders

Apr
15
Pyr
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 15 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]