Rokstu sagataveja: portals lakuga.lv

Vaļsts kulturkapitala fonds (VKKF) 28. decembrī sovā Facebook lopā publicēja viesti, ka apdraudāta daudzu tuo programu, ari Latgolys kulturys programys, realiziešona jaunajā 2023. godā. Tys saisteits ar vaļdeibys plānuotū “Latvijas valsts mežu” (LVM) zīduošonys praksis puortraukšonu. Itūgod LVM zīduoja Kulturkapitala fondam 750 tyukstūšys eiro, nu kurūs piļneigi voi dalieji tyka finansātys vairuokys nūzeimeigys VKKF programys.

VKKF padūmis prīšksādātuoja Dace Bluke nūruodeja: “VKKF padūmis sēde dažys dīnys pyrma Zīmyssvātku nese cīši napateikamys viests kulturys nūzarei. Medejūs jau izskaniejuši vaļdeibys ībyldumi pret AS “Latvijas Valsts meži” zīduojumu politiku. Rezultatā, taidu cytugod nabyus vyspuor – kai VKKF padūmi informēja kulturys ministrs, pat nasaverūt iz juo uzstuojeigim aicynuojumim Ministru kabineta sēdēs akceptēt AS “Latvijas Valsts meži” zīduojumu nūvierzeišonu kulturys jūmai. Finansiejums, ar kuru teik atbaļsteitys vairuokys VKKF kulturys programys, teik sadaleits konkursu kuorteibā. Kotru projektu viertej ekspertu komisejis, vodūtīs piec fonda vispuorejim finansiejuma sadalis principim. Partū es aicynuotu vaļdeibu vēļreiz pi ituo vaicuojuma atsagrīzt, aicynojūt iz sarunu ari kulturys nūzaris profesionaļus i navaļstiskuos organizacejis, kab rysynuotu rodušūs situaceju i fonds ari cytugod varātu izsludynuot konkursus kai regionu kulturys programuos, tai koru i tautys deju tradicejis atteisteibai. Pretejā gadīnī leluokī zaudātuoji itūšaļt byus Latvejis dzeivuotuoji regionūs.”

Kulturkapitala fonds ar AS “Latvijas valsts meži” sasadorboj nu 2011. gods. Pasasokūt jūs zīduojumam, piļneibā voi dalieji teik finansāta programa “Valstiski nozīmīgi kultūras pasākumi”, programa koru i tautys deju tradicejis atteisteibai, kai ari regionu – Kūrzemis, Zemgalis, Latgolys i Vydzemis kulturys programys. Itūgod LVM i VKKF Latgolys kulturys programā, kuru administrej Latgolys regiona atteisteibys agentura, finansiejums tyka pīškierts 61 projektam, par kūpejū sumu 145 850 eiro.

Zemkūpeibys ministrs Didzis Šmits 29. janvarī intervejā LTV1 raidejumā “Rīta panorāma” saceja, ka Kulturkapitala fondam par finansiejumu nav juosabeist: “Itys finansiejums byus, tok tys tiks pīškierts goda suokumā caur centralū budžetu. Nabyus nikas apdaleits.” Šmits pastreipuoja, ka itaida vaļsts uzjāmuma zīduošonys prakse jam nasaruoda pījemama, partū ka vysai tuo peļņai vajadzātu tikt vaļsts budžetā, nu kuruo tod tū ari varātu nūvierzeit konkretim mierkim.