Daugovpilī īskandynuos jaunys varganis

Daugovpilī īskandynuos jaunys varganis

Rokstu sagataveja: portals lakuga.lv

Daugovpilī svātdiņ, 8. janvarī, Dīva Žālsirdeibys Romys katuoļu draudzis bazneicā nūtiks jaunu digitalūs vargaņu īskandynuošona, pīsadolūt vairuokim varganistim ar daudzveideigu muzykalū programu, informej draudzis puorstuove Anna Briška.

Kai stuosta Dīva Žālsirdeibys Romys katuoļu draudzis pravests Aigars Bernāns, jaunūs digitalūs vargaņu byuve ir nūzeimeiga nūtikšona draudzis dzeivē, partū tyka nūlamts Kristus dzimšonys svātku laikā sataiseit svātkus draudzis lūceklim i gostim, kab īskandynuotu jaunū instrumentu i prezentātu tuo plašuos skaniejuma vareibys. Taipat ari jaunūs vargaņu byuve teik saukta par unikala nūtikšonu ar tū, ka tuos ir pošbyuvātys. Jaunū instrumentu projektēja Andris Gribuška, tys tyka taiseits sadarbeibā ar kūkapstruodis uzjāmumu SIA “Galsa” Preiļūs.

Daugovpiļs Dīva Žālsirdeibys Romys katuoļu draudzis bazneicā 8. janvarī 10.30 stuņdēs nūtiks svātdīnis Svātuo Mise, kurys laikā varganis kolpuos liturgiskūs dzīduojumu pavadejuma izpiļdeišonai, sovpus nu 11.30 stuņžu plānuots atskaņuot vysaiduoku laikmatu vargaņu muzyku, atkluojūt instrumenta skaniejuma daudzveideibu dažaida rakstura skaņdorbu atskaņuošonā. Taipat ari plānuota sasatikšona ar meistarim, kuri byuvēja varganis.

Bazneicā izskanēs baroka (J. S. Bahs, D. Bukstehūde), romantisma (F. Lists, F. Bervalds, T. Dibuā) i laikmeteiguo (R. Dubra, D. Germans) vargaņu muzyka. Jaunuos varganis īskandynuos Stanislava Broka Daugovpiļs Muzykys vydsškolys audziekne Zane Uozuoliņa (Ozoliņa), Jāzepa Vītuola Latvejis Muzykys akademejis studente Evelīna Ašķeļaneca, vargaņu projektātuojs Andris Gribuška, varganiste i vargaņu spēlis pedagoge Baiba Betlere.

Daugovpiļs Dīva Žālsirdeibys Romys katuoļu draudzis dīvnoms tyka īsvieteits tik pyrma treis godu, 2019. gods 27. oktobrī, Vyšku īlā 36, Daugovpilī, Kimiku mikrorajonā. Nu 2020. gods 1. oktobra draudzis pravests ir prīsters Aigars Bernāns. Draudzis varganiste i ansambļa vadeituoja ir Nina Šukste.

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]