Grupa “Varang Nord” sataisejuse videoklipu “Troļļs”

Grupa “Varang Nord” sataisejuse videoklipu “Troļļs”

Rokstu sagataveja: portals lakuga.lv

Folklmetala grupai “Varang Nord”, kas izveiduota 2014. godā Daugovpilī i 2019. gods augusta suokumā uzvarēja pasauļa leluokajā metalmuzykys konkursā “Wacken Open Air”, niu izguojs jauns videoklips dzīsmei “Troļļs”.

Grupys sastuovā ir pīci cylvāki – vokalists i gitarists Maksims Popovs, basists Edgars, buņdzinīks Aigars Zeiza, sytamūs instrumentu meistars Vjačeslavs, akordeoniste i vokaliste Jeļena Kaļniša i jauns gitarists Rinalds.

Dzīsmei “Troļļs” īdvasma jimta nu Skandinavejis mitologejis par meža miļžim, kuri beja dzeiveibai beistomi i beiduos viņ nu guņs i alkohola smuorda. Sovpus deļ videoklipa tyka lamts puorvērst dzīsmis nūsaukumu cytā vierzīnī i paruodeit tū “troļļuošonys” aba provociešonys nūzeimē. Dzīsmis vuordu autors ir Aigars Zeiza, idejis autors – Maksims Popovs.

Dzīsme ir vīna nu 11 kompoziceju nu grupys nu cikom jaunuokuo, piec skaita catūrtuo albuma “Pārkiuņa uomurs”, kas izguoja 2021. godā.

Tyvuokī grupys koncerti paradzāti 3. februarī Tallinā, klubā “Tapper” (beleti ITE) i 4. februarī Reigā, klubā “Melnā piektdiena” (beletus var dabuot ITE).

Dzīsmis vuordi:

Myusu solā stuosta,
Ka naktī kūki staigoj,
Zornys mātoj uorā,
Kas molā nasaver.

Kod veiri īt mežā,
Tī guni dadzyna,
Atbaida jis troļļus,
Zvārus tuoli puordzyna.

Pateik trollim tī,
Kas ola vysa nadzer,
Gaļa taidim meiksta,
I kauli soldoni.

Zinit veiri tū,
Ja gribit izdzeivuot,
Dzerit vaira ola,
I jius nakers lelais…

Troļļs!
Zornys mat tuoļ!

Reizi sātā siežu,
Tymsa beja nakts,
Troli skraida mežā,
Kūkim zorus lauž.

Natycu es spļetņom
Par meža brīsmūnim,
Mīrynoju sīvu
Lai sātā nasabļaun.

Buoba prosa mani,
Lai es tūs dzanu prūm,
Izguoju es ari,
I mani aiztīk jis.

Sytu jam pa purni,
Ciervi jamu rūkos,
Tys maņ syt pa kupri,
I lānom zornys ād.

Troļļs!
Zornys mat tuoļ!

Print Friendly, PDF & Email

Nūtikšonu kalendars

Feb
4
Sai
vysu dīnu TLMS “Dzīpariņš” 45 darbeibys go... @ Latgolys Kulturviesturis muzejs
TLMS “Dzīpariņš” 45 darbeibys go... @ Latgolys Kulturviesturis muzejs
Feb 4 vysu dīnu
Jaunū izstuožu godu Latgolys Kulturviesturis muzejs īsuoc kūpā ar ilggadejū i vysod atsauceigū sadarbeibys partneri – Tautys lītiškuos muokslys studeju “Dzīpariņš”. Tei nūdybynuota jau 1978. godā i apvīnoj sevī vysaidu paaudžu rūkdarbneicys, kurys saista kūpeiga[...]