Muzykys īrokstu goda bolvys “Zelta mikrofons” nominantu vydā ari “Rupuči” i “Tautumeitas”

Muzykys īrokstu goda bolvys “Zelta mikrofons” nominantu vydā ari “Rupuči” i “Tautumeitas”

Rokstu sagataveja: portals lakuga.lv

12. janvarī svineigā ceremonejā Kīpsolys hallē Reigā tyka paziņuoti Muzykys īrokstu goda bolvys “Zelta mikrofons” nominanti 19 kategorejuos. Nominantu vydā ar īrokstim, kuruos skaņ latgalīšu volūda, ari grupys “Rupuči” i “Tautumeitys”.

Grupa “Rupuči” ar albumu “Vuškeņa iz pļovys” tyka par vīnu nu pīcu pretendentu iz uzvoru kategorejā “Muzykys albums bārnim”, kur Kristapa Rasima i juo bārnu – Terēzis i Ernesta – dzīduotuos dzīsmis ar Kristapa muzyku i Ilzis Spergys vuordim nu bārnu dzejūļu gruomotys ar taidu pošu nūsaukumu konkurēs ar vokalū studeju “Spāre”, NBS Štaba orkestra estradis ansambli, bārnu estradis studeju “Kukuragi” i Uku i Lelis dzīsmem. Bārnu dzejūļu gruomota i dzīšmu albums “Vuškeņa iz pļovys” (izdeviejs latgalīšu kulturys kusteiba “Volūda” (bīdreiba “LgSC”)) pārn sajieme ari latgalīšu kulturys goda bolvu “Boņuks”.

Karteņā: grupys “Rupuči” nominanta diploms, foto Edeite Husare/portals lakuga.lv

Vasalys divejis nominacejis sajieme muzykys grupa “Tautumeitas” – vīna nu tūs kategorejā “Tautys voi pasauļa muzykys albums” par albumu “Skrejceļš”, kurā vydā ari vairuokys dzīsmis latgaliski, kai ari kūpā ar Renāru Kauperu īdzīduotā dzīsme “Muoseņa” tyka par nominantu tautys bolsuojuma kategorejā “ELVI Goda dzīsme”.  Dzīsmi ar sovu bolsuojumu var atbaļsteit kotrys TV3 sātyslopā ITE. Itamā pošā kategorejā par tautys i pasauļa muzykys albumu nomināta ari folklorys kūpa “Skandinieki” par albumu “Dvēsele” – tymā skaņ ari vīna dzīsme latgaliski. “Zelta mikrofons” nominaceju dabuoja ari grupys “Prāta Vētra” koncerta “Gads bez kalendāra” koncerta īroksts nu Mežaparka, kurā pīsadaleja i “Tautumeitas”.

Vēļ natīši diveju nominantu pretendiešonā bolvai pīsadola ari latgalīšu hiphopere Ūga, kura pīsadalejuse dzīsmis “Bēgums” īrokstā Artura Skuteļa albumā “Jā”, kas nomināts kategorejā “Hiphopa muzykys albums”, kai ari dzīsmis “Dunka” īrokstā Shipsea (Jāņa Šipkēvica) albumā “Apgaismo mani”, kas nomināts kategorejā “Popmuzykys albums”.

Muzykys īrokstu goda bolvys “Zelta mikrofons”, kas ir svareiguokuo popularuos muzykys bolva Latvejā, sajiemieji tiks paziņuoti 18. februarī svineigā ceremonejā Reigā, Kīpsolys hallē. Itūgod iz ceremoneju beletus var nūpierkt sevkurs grybātuojs. Bet kai “Rupučus”, tai “Tautumeitys” byus vareiba dzierdēt ari ituo gods latgalīšu kulturys goda bolvys “Boņuks 2022” ceremonejā.  

Vaira par vysim bolvys “Zelta mikrofons” nominantim var izzynuot ITE.

Print Friendly, PDF & Email

Kalenders

Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]