Rokstu sagataveja: portals lakuga.lv

Pārnejais gods Rēzeknis sīvīšu koram “Medicus” nūsaslēdze ar gandarejuma pīpiļdejumu – 2022. goda decembra golā izdūts kora ūtrais albums “Čučiet! Šūpuļdziesmas”, kurā vydā ostonis dzīmis ar vairuokom taišni koram taiseitom aranžejom, viestej kora puorstuovi.

Par vēļ vīnu kora muzykys albumu “Medicus” dzīduotuojis dūmoja vairuokus godus, bet ideja par šyupeļa dzīsmem izakristalizēja pandemejis godūs. Kad otkon varēja saīt kūpā, suocēs aktivs mieginuojumu i īrokstu laiks, kas kulminaceju sasnīdze pārnejuo goda ūtrajā pusē. 2022. gods koram beja ari 55. jubilejis gods, kū dzīduotuojis gribēja atzeimēt ar palīkūšu vierteibu – jaunu albumu.

“Šyupeļa dzīsmēs kai sarunuos atsakluoj sovstarpejuos saskanis i pasaļaušonuos darbeiba. Myusu šyupeļa dzīsmis ir maigys i īdvasmojūšys, ekspresivys i apvaļdeitys, meilūšys i mīrynūšys, leidzsvoru dūdūšys,” atzeimej kora daleibneica Nellija Žogota, kura ir albuma īvodteksta autore. Albumā īkļautys ostonis dzīsmis, i vairuokys nu tūs komponisti Ilona Rupaine, Guntra Kuzmina-Jukna, Mārcis Lipskis aranžiejuši taišni koram “Medicus”.

Projekts eistynuots ar Vaļsts kulturkapitala fonda mierkprogramys “Latvejis Vaļsts mežu atbolsts koru i tautys deju tradicejis atteisteibai” i Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” finansiejumu.

Paļdejūt kora dirigentei Andai Lipskai, projekta laikā izaveiduoja veiksmeiga sadarbeiba ar vairuokim muokslinīkim, i īrokstūs pīsadaleja kai J. Ivanova Rēzeknis Muzykys vydškolys bārnu kors, tai muziki Arnis Slobožanins (gitara, bolss), Guntra Kuzmina-Jukna (bolss), Laura Svikša (bolss), Haralds Bauga (saksofons), Antra Vallere (klavīris), Jānis Veličko (klavīris), Lāsma Zunda (Inkina) (varganis), Mārcis Lipskis (kontrabass), Katrīna Kozlova i Domeniks Slišāns (perkusejis), bet audio īrokstus veice Einārs Lipskis.

Kora daleibneicys soka: “Kab saglobuotu lobu kora skaniejumu, vajadzeigi ari leluoki izaicynuojumi, tymā skaitā juopīsadola starptautyskajūs konkursūs, a konkursu dasacejumūs juoīsnādz audio īroksti. Niu koram byus jauni audio īroksti, deļtam varēs vērtīs ari jaunūs muzykalu izaicynuojumu tuolumūs. Albums byus kora reprezentacejis materials (puordūšonai nav paradzāts), bet cikom vīnu nu īraksteitūs dzīšmu ar Arņa Slobožanina muzyku i Andryva Jūrdža vuordim “Leiču, leiču” var nūsaklauseit ite:

Rēzeknis sīvīšu kors “Medicus” dybynuots 1967. godā kai medicinys darbineiču kors, bet itamā šaļtī korī dzīd dažaidu profeseju puorstuovis ar leidzeigu vierteibu sistemu, kas korī veidoj sovstarpejū sapratnis i atbolsta nūskani. Pymais kora “Medicus” albums CD formatā “Nu reiteņa caldamuos” izdūts 2015. godā.