Rokstu sagataveja: portals lakuga.lv

Rēzeknis Centraluo biblioteka (RCB) jaunu godu īsuokuse ar jaunu aktivitati – bibliotekys Instagram konts @rezeknes.biblioteka 2023. godā veļteits latgalīšu literaturai. Izaicynuojums kotru mienesi puorskaiteit kaidu gruomotu latgaliski, izgleitojūšys aptaujis i jūceigī vaicuojumi ir tik daļa nu aktivitašu, kū janvara pyrmūs nedeļu laikā biblioteka socialajā medejā jau paspiejuse pīduovuot.

Bibliotekys Instagram kontu veidoj tuos Informacejis tehnologeju nūdalis vadeituoja – golvonuo bibliotekare Anna Romanovska, kas ir atbiļdeiga ari par cytu RCB socialūs medeju saturu. Jei stuosta, ka izdūmuojuši Instagram komunicēt taišni par latgaliskū saturu diveju īmesļu dieļ: “Tei ir pabreiva niša Instagram (eipaši biblioteku kontūs!), kai ari jiutamīs leidzatbiļdeigi par latgaliskuo napagaisšonu, latgalīšu gruomotnīceibys i volūdys populariziešonu. Par latgaliskū i latgaliski ir juokomunicej, eipaši “nagarlaiceigā” formatā. Jo vairuok, jo lobuok!  Taidi “nagarlaiceigi” ari asam īplānuojuši byut.”

Pagaidom ir skaidrys, ka latgalīšu literaturai Instagram tiks veļteits vyss 2023. gods, kai byus iz prīšku – tū ruodeis laiks. Anna Romanovska ari pastreipoj, ka itaida veida i satura komunikacejis kanala uzturiešonai ir vajadzeiga ari pīteikama cylvākresursu kapacitate, seviški cylvāki, kuri muok raksteit latgaliski. Jei poša pi itūs zynuošonu tykuse filologejis studejuos Rēzeknis Augstškolā. “Prūtams, volūda, eipaši rakstiski, ir ari juolītoj ikdīnā, lai naaizmierstu. Kas aizmiersts, juomeklej gramatikys gruomotā, vyss vīnkuorši. Varu pasaceit lelu paļdis sovim vacuokim, kas nasekuoja myusu dīnu mūdei pošim sovā storpā runuot latgaliski, a ar bārnu – latviski jeb “pareizajā latviešu valodā” (tys nikas, ka ar mežūneigu akcentu!). Meilī, tys tok ir taisnais ceļš iz volūdys nuovi! A ar raksteišonu ir vēļ trokuok – runuot sovim bārnim latgaliski daļa vacuoku vēļ īvuica, a skaiteišona i raksteišona jau ir kosmoss. Vacuokim pošim tū nivīns vairumā gadejumu nav vuicejs… Muna mama i tēte ari skaiteja latgaliski. Tēte saceja taišni “skaiteit”, na laseit, zynu, ka daudzi grūza dagunus, kod dzierd itū vuordu uorpus matematisku darbeibu konteksta. Sātā beja gruomotys latgaliski, žurnals “Katōļu Dzeive”, mamai beja ar rūku raksteitys kladis ar bazneicys dzīsmem i lyugšonom latgalīšu volūdā,” tai Anna.

Vīnā nu eisūs video, kas apsaverami bibliotekys Instagram, radzams, ka gruomotys latgalīšu rokstu volūdā ir markātys ar dzaltonu uzleimi. Cik pīpraseita pi jūs ir literatura latgaliski? “Prūtams, vysod var gribēt vairuok, bet nikaidā zinī navarim ari saceit, ka literaturu latgalīšu volūdā vyspuor najem, jem gon. 2022. godā Rēzeknis Centralajā bibliotekā laseituojim tyka izsnāgtys 562 gruomotys latgalīšu volūdā. Pyrmajā vītā pīprasejuma ziņā īsaryndoj Inetys Atpilis-Juganis dzejūļu gruomota “Spuornu golu šolks”,” stuosta Anna Romanovska. Kab popularizātu latgalīšu literaturu, RCB teik reikuotys izstuodis, gruomotu prezentacejis, sasatikšona ar literatim. Ari latgalīšu gruomotu plaukts, piec Annys vuordu, atsarūn na bibliotekys “tuoļuokajā koktā”, bet pošā radzamuokajā vītā.