Izsludynuots Aijis Erinis pīminis konkurss “Nūdreb sirds…” jaunajim vokalistim i dzīšmu autorim (lobuots)

Izsludynuots Aijis Erinis pīminis konkurss “Nūdreb sirds…” jaunajim vokalistim i dzīšmu autorim (lobuots)

Rokstu sagataveja: portals lakuga.lv

Piec pandemejis laika puortraukuma itūgod otkon nūtiks Aijis Erinis pīminis konkurss “Nūdreb sirds…” jaunajim vokalistim i dzīšmu autorim. “Asam aizvadejuši div tukšuma godus – bez kulturys, bez sporta, bez sasatikšonys, bez prīcys i panuokumu. Pasauļs īt i puorsamej, cylvāki pīsalāgoj situacejai i turpynoj dorbuotīs iz prīšku. Ari mes, Eriņu saime, gribim atjaunuot īsuoktū – organizēt konkursu Aijis Erinis pīmiņai “Nūdreb sirds…”,” viestej Eriņu saimis puorstuove Agnese Eriņa.

Konkursa mierkis ir veicynuot bārnu i jaunīšu vokalūs, muokslinīcyskūs i literarūs spieju atteisteibu, kai ari atkluot jaunus talanteigus bārnus i jaunīšus, kuri poši roksta tekstus, muzyku, kai ari tū izpylda, motivejūt jūs rodūšū pošizasaceišonu.

Konkurss nūtiks 2023. gods 6. majā Rēzeknis nūvoda Drycānu kulturys nomā. Tymā atseviški tiks vārtāti vokalisti i dzīšmu autori. Vokalistu konkursa dalinīkim byus juoizpylda divejis dzīsmis piec breivys izvielis, jī tiks vārtāti treis vacuma grupuos: “Cālīši” (4-8 godi), “Cīrulīši” (9-13 godi) i “Lakstīgalas” (14-19 godi). Sovpus originaldzīšmu konkursā aicynuoti pīsadaleit jaunī autori vacumā nu 9 leidz 19 godim. Tymā byus juoizpylda vīna dzīsme ar originaltekstu voi jau publicātu dzeju. Dzīsmi var izpiļdeit pats autors, cyts solists voi ansamblis. Kai vokalistim, tai dzīšmu autorim pīsacejumi konkursam juoīsnādz elektroniski leidz 24. apreļam, syutūt tūs iz e-posta adresu andriserins@inbox.lv.

Konkursa nūlykums i pīsasaceišonys anketys atrūnamys ITE.

Pyrmais konkurss Aijis Erinis pīmiņai “Nūdreb sirds…” nūtyka 2019. godā. Beja paradzāts tū reikuot reizi div godūs, tok pandemejis ītekmis dieļ 2021. godā tys tyka puorcalts iz laiku, kod byus taida apstuokļu vareiba.

Dzīduotuoja i dzīšmu autore Aija Eriņa, kurys dzymtuo puse beja Drycāni, myužeibā nūguoja pieški 2017. goda vosorā. Leluoku atpazeistameibu Aija dabuoja kai TV šova “Latvejis talants 2008“ uzvarātuoja i kod kūpā ar saimi pīsadaleja šovā “Dziedošās ģimenes“. Aijis bolss ar daudzom popularom dzīsmem skaniejs Latvejis radeju stacejuos, kai solomuokslineica i kūpā ar sovu saimi sovulaik snāguse vaira nakai 100 koncertu vysā Latvejā. Piec dzīduotuojis nūīšonys myužeibā juos padareitais tyka apkūpuots i izdūts divejūs albumūs – “Par martu, maiju un decembri“, kurā īkļautys 11 dzīsmis i tuo kūdulu veidoj Aijis Erinis i Valda Metlāna treis godu laikā kūpeigi komponātuos dzīsmis ar Ojāra Vācieša i Klāva Elsberga dzeju, kai ari Aijis tekstim. Taipat Aijis tāva Andra Eriņa sakuortuots izguoja dubultalbums: “Aija Eriņa. Izlase“, kurā īkļauti 19 solodzīduojumi, dzīsmis kūpā ar dzīdūšū Eriņu-Vuorkaļu saimi, kai ari koncertīroksti, bet ūtrajā daļā “Nepaspēju“ 16 īskiciejumi i nadabeigtī dorbi.

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]