Rokstu sagataveja: Laura Spundere, Edeite Husare, portals lakuga.lv

Ituo gods suokumā četru godu jubileju svietej Latvejis e-gruomotu biblioteka 3td.lv, kas kai bezmoksys pakolpuojums daīmams pošvaļdeibu publiskūs biblioteku informacejis sistemā registrātim lītuotuojim. Itūšaļt e-gruomotu bibliotekā gondreiž 18 tyukstūšys lītuotuoju var puorskaiteit vaira nakai 550 gruomotu, tok nu tūs cikom nav nivīnys latgaliski.

Latvejis e-gruomotu bibliotekys platformu nūdrūsynoj Kulturys informacejis sistemu centrys sadarbeibā ar “Tietoevry” i četru godu laikā puorskaiteitūs gruomotu skaits jau ir vaira nakai 125 tyukstūšys e-gruomotu, kū puorskaitejuši gondreiž 18 tyukstūšys skaiteituoju – leidza ar tū platformu 3td.lv var daleidzynuot leluokajom publiskajom bibliotekom vaļstī. Bibliotekys ir vysplotuok puorstuovātais kulturys īstuožu teiklys Latvejā, tuo atteisteiba vysu tīšuokajā veidā ītekmej kulturys i izgleiteibys dzeivi Latvejā, dorūt ari integracejis i socializacejis funkceju. “Trešais tēva dēls” aba “3td” ir vaļsts finansāts projekts, kura mierkis ir stuosteit sabīdreibai par izmaiņom, kas jau ir nūtykušys i vēļ nūtiks publiskajuos bibliotēkuos i motivēt vysaiduokys mierkauditorejis izmontuot bezmoksys daīmamūs resursus.

Itūšaļt e-bibliotekā teik pīduovuota kvalitativa latvīšu i tulkuotuo literatura e-gruomotu formatā, dūdūt skaiteituojim tematiskū i žanru daudzveideibu. Pyrmajā godā platformā daīmamūs gruomotu skaits bejs viņ 114 i tik nu “Zvaigzne ABC”, nu itūšaļt tuos jau ir 564 gruomotys nu dažaidu e-bibliotekys sadarbeibys partneru, tok cikom tūs vydā nav nivīnys gruomotys latgaliski.

Kai portalam lakuga.lv pastuosteja “3td E-grāmatu bibliotēka” projekta vadeituoja asistente Ilma Esberga, tod ar īinteresātom izdevnīceibom Kulturys informacejis sistemys centrys, kas puorvolda 3td.lv, slādz leigumus par e-gruomotu īvītuošonu platformā. Itūšaļt 3td.lv e-gruomotys pīduovoj izdevnīceibys “Zvaigzne ABC”, “Latvijas Mediji”, “Apgāds Mansards”, “Prometejs” i “Jumava”, atbylstūši izdevnīceibu nūslāgtim leigumim ar autorim voi autortīseibu puorstuovūšuom agenturom. E-gruomotys teik izvītuotys platformā piec izdevnīceibu izvielis, respektivi, izdevnīceibys pošys izalosa, kurys gruomotys tiks davīnuotys elektroniskajā bibliotekā.

Gruomotu izviele e-bibliotekā ir atkareiga nu izdevnīceibys marketinga strategejis, i ari nu tuo, voi ir sajimta autora atļuove publicēt gruomotu taida veida platformā. Da ituo nivīna izdevnīceiba nav pīduovuojuse gruomotys latgalīšu rokstu volūdā.

Kai skaidroj Ilma Elsberga, projektā sadarbeiba nūteik ar juridiskom personom – izdevnīceibom. Taitod vīns autors, ka viņ nav nūformāts kai juridiska persona, atseviški navarēs davīnuot sovu gruomotu e-gruomotu bibliotekā. Vystik Ilma Elsberga pastreipoj, ka da šam projekta eistynuotuoji ir individuali uzrunuojuši izdevnīceibys, ari stuostejuši plotuok par vareibu pīsavīnuot e-gruomotu bibliotekā Latvejis Gruomotizdeveju asociacejis kūpsapuļcē. Kai svareigu faktoru Elsberga pastreipoj, ka izdevnīceibai juobyut gotovai nūdrūsynuot e-gruomotu formatu tehniskuos praseibys i byutu juridiski sakuortuojuse vaicuojumus par autortīseibom ar gruomotu autorim. “3td” e-gruomotu autorim teik ari atleidzeiba, kas teik apriekinuota par kotru e-gruomotys skaiteišonys reizi.

Itūšaļt 3td.lv e-gruomotu biblioteku izmontoj jau 17 900 skaiteituoju, nu kurūs Latgolys regionu puorstuov aptyvai 1600 skaiteituoju. Sevkurs jauns interesents sovā bibliotekā var sajimt autorizacejis datikšonu “3td” e-gruomotu bibliotekai. Autorizejūtīs platformā, skaiteituojs var izalaseit sev vālamū e-gruomotu skaiteišonai iz div nedeļu termeņu ar vareibu sajimt taidu pošu dorbu vēļ iz divejim div nedeļu terminim. Vīnlaiceigi skaiteituojs var pajimt divejis e-gruomotys i, vyrtuali nūdūdūt gruomotys e-bibliotekā, var skaiteit leidz pat 18 gruomotu mienesī.