Preiļūs atkluos kulturviesturnīkam Pīteram Zeilem veļteitu ekspoziceju

Preiļūs atkluos kulturviesturnīkam Pīteram Zeilem veļteitu ekspoziceju

Rokstu sagataveja: portals lakuga.lv

Pīktdiņ, 10. februarī, 14.00 stuņdēs Preiļu Golvonajā bibliotekā nūtiks Preiļu nūvoda Gūda piļsūņam, filozofam i kulturviesturnīkam Pīteram Zeilem (1928-2020) veļteitys ekspozicejis svineiga atkluošona, informej Preiļu viesturis i lītiškuos muokslys muzeja puorstuove Ilona Vilcāne. Interaktivuo i puorvītuojamuo Preiļu muzeja ekspoziceja “Pēteris Zeile. Domu un atmiņu makšķernieks” tyka sataiseita paguojušajā godā ar Vaļsts Kulturkapitala fonda atbolstu.

Tai kai Pīters Zeile jau nu agrys bierneibys vysu myužu beja saisteits ar gruomotom, ekspoziceja ir taiseita lelys, attaisamys gruomotys formā i tuos pyrmuo izstuodeišonys vīta ir Preiļu Golvonajā bibliotekā.

Pelieču pogostā 1928. gods 14. janvarī dzymušuo Pītera Zeilis bierneiba i jauneiba saisteita ar Preiļu nūvodu – Lelajim Mazurim, Peliečim, Nīdermuižu, Juosmuižu, Aglyunu, Preilim –, partū ekspozicejā car juo atmiņom, bolstūtīs ari tuoluokajā P. Zeilis rodūšajā dorbā, izcalts itai teritorejai rakstureigais kulturviesturiskais montuojums i geografiskuos eipatneibys, reizē veidojūt saikni ar vyspuorejū Latvejis kulturvidi, it eipaši Raiņa montuojumu. Ekspozicejis apmaklātuoji car Pītera Zeilis bierneibā i jauneibā pīdzeivuotuo prizmu var izzynuot, kai tyka puorveiduota juo dzymtuos vītys ainova, kaidys beja školys gaitys pyrmskara, kara i pieckara godūs, kū bārni dareja gonūs i daudz kū cytu par nūvodu i tuo ļaudim.

Ekspozicejis nūsaukums baļsteits Pītera Zeilis leluokajā hobejā – zyvu giušonā, kas aizasuoce bierneibā pi Dubnys upis. Partū izstuodis taiseišonā tyka īsaisteiti ari Preiļu Muzykys i muokslys školys Muokslys nūdalis audziekni, kas paguojušuo gods septembrī zyvu giušonys i zeimiešonys plenerā Vuorkovys muižys parkā Dubnys krostā sovūs zeimiejumūs īmyužynuoja Dubnys zivs – itī dorbi papyldynoj ekspoziceju.

Ekspozicejā izvītuotys gruomotys nu Pītera Zeilis bibliotekys, kai ari vysaidys spēlis i aizdavumi bārnim. Partū īpasazeit ar ekspoziceju i izmontuot tuos pīduovuotuos izzynūšuos i rodūšuos aktivitatis eipaši aicynuoti bārni i jaunīši.  

Ekspoziceja baļsteita Preiļu viesturis i lītiškuos muokslys muzeja kruojumā, tymā skaitā Pītera Zeilis meitys Zanis Zeilis boguoteigajā duovynuojumā, kas saisteits ar juos tāva personeibu i rodūšū darbeibu.

Print Friendly, PDF & Email

Nūtikšonu kalendars

Mar
29
Tre
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 29 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Mar
30
Cat
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 30 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]