14 dzīsmis latgaliski ap meileibu

14 dzīsmis latgaliski ap meileibu

Rokstu sagataveja: portals lakuga.lv

Pasaulī šudiņ, 14. februarī, svietej Svātuo Valentina dīnu aba vīnkuorši Valentina dīnu i tuos golvonais vuords ir meileiba (cyts saceis – mīlesteiba). Turpynojūt tradiceju pīduovuot dažaidu dzīšmu izlasis, itai dīnai par gūdu kab skaņ četrpadsmit dzīsmis ap meileibu latgaliski.

1. Borowa Mc – Vysskaistuokajai meitinei

Var saceit, ka absoluta latgalīšu muzykys klasika, kas sovulaik dabuojuse vysus leluokuos Latvejis muzykys apbolvuojumus. Dzīsmis, kas publicāta 2005. godā izguojušajā albumā “Trepis iz nakurīni” pamatā ir tautā labi zynomuo dzīsme, kurai grupa īdavuse sovu verseju. Grupys sastuovā: Aigars Runčis, Guntra Kuzmina i Ingars Gusāns. Dzīsmi grupys solists Aigars Runčis veļtejs sovai mīlesteibai i niu jau sīvai Agnesei.

2. VM – Sovam cylvākam

Vēļ vīna dzīsme ar “viesturi”. Dzīsmis “Sovam cylvākam” izpiļdeituojs ir grupa “VM” no Bolvu. Sovulaik itei dzīsme bejuse nomināta ari latgalīšu kulturys goda bolvai “Boņuks 2008” kai vīna nu 2008. gods lobuokūs roka dzīšmu. Dzīsmis autori ir Edgars Bukšs i Edgars Oplucāns.

3. Naktenīks un Reiti (feat. Mygla) – Duovynoju tev

Apvīneibys “Naktenīks un Reiti” dzīsme par mīlesteibu. Apvīneiba cikom ir vīna nu nūslāpumainuokūs latgalīšu muzykys grupu, kas cikom viņ atkluoj, ka dzīsme ir nu ituo gods pyrmajā pusē plānuotuo apvīneibys pyrmuo albuma “Audziks”.

4. Latgales dāmu pops – Es un tu

Grupys “Latgales dāmu pops” dzīsme “Es un tu” ir nu 2005. godā izdūtuo albuma “Es tava topmodele”. Dzīsmis vuordu i muzykys autore ir Anita Bērziņa.

5. Bez PVN – Zalts

Cikom jaunuokais grupys “Bez PVN” skaņdorbs nu marta vydā gaidamuo albuma “Paraleli horizonti”. Dzīsmis video radzamī kadri ir nu vysu pīcu grupys daleibnīku dzeivis privatūs albumu i tim beja tik vīns nūsacejums – tai juobyut vītai voi nūtykumam, kurā kotrys nu jūs beja laimeigs. Bet par pošu dzīsmi grupys liders i dzīsmis autors Kristaps Rasims soka: “Dzīsme ir veļtejums munai sīvai Baibeņai – munam zaltam. Kab i jums kotram rādā ir cylvāks, ar kuru viertīs vīnā vierzīnī!”

6. Sovvaļnīks – Vysums

Dzīsme nu Sovvaļnīka ūtruo albuma “Bolts susātivs”, kas izguoja 2010. godā. Dzīsmis vuordu autors ir Ontons Kūkuojs.

7. Dabasu Durovys – Tai tam byus byut

Dzīsme nu grupys “Dabasu Durovys” pyrmuo albuma “Lepetnīks”, kas izguojs 2008. gods rudinī. Dzīsmis muzykys i vuordu autors ir grupys solists Arņs Slobožanins.

8. Laimas Muzykanti – Tuoli dzeivoj

Vīna nu legendaruokajom latgalīšu dzīsmem grupys “Laimas Muzykanti” versejā nu tuos albuma “Gonam gona”, kas izdūts 2002. godā.

9. Poparts – Muna sirds

Latgalīšu dueta “Poparts”, kurymā dorbojās Guntra Kuzmina-Jukna i Ingars Gusāns, pyrmuo dzīsme i videoklips “Muna sirds” ir lavandkruosys stuosts par vairuoku paraleļu izdzeivuošonu i desmit sekunžu ilgumā ocu skatīņa nūgiušonu. Klips filmāts kai Rēzeknē, tai ari Reigā, Saulkrostūs i Limbažūs. Videoklipu taisejuse “Latgolys entuziastu grupys BIĻDIS” komanda. Dzīsmis muzykys autori ir duets “Poparts”, vuordi – “Poparts” i Valentins Lukaševičs.

10. Trešīs Ņutona lykums – Pi raja vuortu

Grupys “Trešīs Ņutona lykums” dzīsme ar Ontona Slišāna vuordim “Pi raja vuortu”, publicāta 2018. godā. Dzīsmis teksts ir nu Slišāna erotiskuos dzejis kruojuma “Salve Regina” i klipā grupa raudzejuse akceņtēt diveju cylvāku tīkšonūs vīnam da ūtra i saplyusšonu vīnā gareigā i emocionalā vasalumā. Dzīsmis muzykys autors ir Guntis Rasims.

11. Unknown Artist – Pa fāziem

Zīmeļlatgolys grupys “Unknown Artist” dzīsme “Pa fāziem” nu grupys debejis albuma “New Folder”. Sovulaik par itū dzīsmi grupa raksteja: “”Kauliņi ir mesti!”, saceja Jūlijs Cēzars pyrma škārsova Rubikonas upi! Ari “Unknown Artist” ir gotovi īmest YouTube jaunu i soldanu treku! Tys ir koč kas vieļ nabejs, “Unknown Artist” atver sirds dziļuokūs kambarus i  nūdūd jiusu baudejumam dzīsmi “Pa fāziem”. Dzīsmē tīk izmantoti vieļ nabejuši saleidzynuojumi i metaforas!”

12. Laura Bicāne – Mīlesteiba

Dzīsmis izpiļdeituoja i muzykys autore ir Laura Bicāne. Dzīsmis teksts jimts nu Bībelis, Apostola Puovula pyrmuos viestulis korintīšim, 13. nūdaļa. Dzīsme īkļauta Laurys 2013. godā izdūtajā albumā “Es tikai ļaujūs”.

13. Škilbānu etnografiskais ansamblis – Kuodas acs(i) Juoneišam

Dzīsme nu Škilbānu etnografiskuo albuma “Škilbanu sīvas”, kas izguojs, svietejūt ansambļa 35 godu jubileju 2006. godā. Ļusteiga dzīsme par mīļuošonu jaunu i vacuoku ļaužu vydā.

14. Inga i Normunds – Vīns reits

Dzīsmis muzykys autore Guntra Kuzmina-Jukna i teksta autore Ineta Atpile-Jugane, bet izpiļdeituojs duets “Inga un Normunds”. Dzīsme nu dueta 10. albuma “Munai Latgolai”, kas izguojs 2015. godā.

Print Friendly, PDF & Email

Kalenders

May
19
Svā
all-day Foto muokslinīka Juoņa Gleizda s... @ Latgolys viestnīceiba "Gors"
Foto muokslinīka Juoņa Gleizda s... @ Latgolys viestnīceiba "Gors"
May 19 all-day
Nu 9. apreļa da 19. maja Latgolys viestnīceibys “Gors” Muokslys galerejā i pyrmuo stuova seminaru telpā eksponāta foto muokslinīka Juoņa Gleizda symtgadei veļteita izstuode “GAISMĀ. punkts”, informej “Gora” puorstuove Santa Kļaviņa. Izstuode sastuov nu Juoņa[...]
all-day Latgolys grafikys simpozeja izst... @ Rotko muzejs
Latgolys grafikys simpozeja izst... @ Rotko muzejs
May 19 all-day
Pīktdiņ, 22. martā, 16.00 stuņdēs Rotko muzejā nūtiks 12. Storptautyskuo Latgolys grafikys simpozeja nūslāguma izstuodis atkluošona i muokslinīku gūdynuošona.   Storptautyskais Latgolys grafikys simpozejs, kas itūgod nūteik nu 8. da 22. marta, jau divpadsmytū reizi[...]
all-day Rotko muzeja pavasara sezonys iz... @ Rotko muzejs
Rotko muzeja pavasara sezonys iz... @ Rotko muzejs
May 19 all-day
1. martā ar četrom jaunom Latvejis muokslinīku izstuodem tiks atkluota Rotko muzeja pavasara sezona. Kai informej muzeja puorstuovi, tamā byus apsaverama izstuode “Bastions”, kuru veiduojuse vīna nu Latvejis laikmeteiguos gleznīceibys spūdruokūs muokslineicu – Frančeska Kirke, fotografa[...]