Apvīnuos Rēzeknis Muzykys i muokslys vydsškolys, izveidojūt Latgolys Muzykys i muokslys vydsškolu

Apvīnuos Rēzeknis Muzykys i muokslys vydsškolys, izveidojūt Latgolys Muzykys i muokslys vydsškolu

Rokstu sagataveja: portals lakuga.lv

Itymā pavasarī tiks suokta Rēzeknis Muokslys i dizaina vydsškolys (RMDV) i Juoņa Ivanova Rēzeknis Muzykys vydsškolys (JIRMV) reorganizaceja, kab leidz 1. augustam izveiduotu apvīnuotū Latgolys Muzykys i muokslys vydsškolu (LMMV), informej RMDV direktoris vītneica komunikacejis jūmā Madara Bērtiņa.

Kai nūruoda Kulturys ministreja (KM), kuruos padūteibā dorbojās obejis izgleiteibys īstuodis, kai RMDV, tai JIRMV uzruoda augstus sasnāgumus i sagatavej atzeitus specialistus muzykys, muokslys i dizaina jūmā, kai ari aktivi leidzadorboj Rēzeknis vaļstspiļsātys, Rēzeknis nūvoda i vysa Latgolys regiona kulturys dzeivē. Obejom īstuodem ir nalels vuiceibys prīšklaiceigai puortraukušūs audziekņu skaits, tok ir augsts absolventu skaits, kuri turpynoj vuiceibys augstuokuos izgleiteibys īstuodēs.

Reizē saleidzynūši nalelais izgleitojamūs skaits da ituo nav ļuovs pretendēt iz profesionaluos izgleiteibys kompetencis centra (atbylstūši grūzejumim lykumā, itūšaļt – muokslu izgleiteibys kompetencis centra (MIKC)) statusu. JIRMV i RMDV apsavīnojūt i dabojūt MIKC statusu, jaunuo izgleiteibys īstuode spēs pylnvierteiguok atteisteit metodiskū i myužizgleiteibys dorbu, kai ari tiks veicynuota finanšu i cylvākresursu efektivuoka izmontuošona.

Kai vīns nu golvonūs apsavīnuošonys īgivumu byus vareiba pretendēt iz Eiropys Savīneibys (ES) fondu leidzeklim infrastrukturys moderniziešonai, jo, kai līcynoj indikacejis par ES leidzekļu izlītuojumu, tūs varēs īguļdeit tik izgleiteibys īstuodēs ar kompetencis centra statusu.

Piec apsavīnuošonys Latgolys Muzykys i muokslys vydsškola paliks par leluokū muokslu izgleiteibys īstuodi Austrumlatvejā – tamā profesionaluos īvierzis i profesionaluos videjuos izgleiteibys programuos vuiceisīs vaira nakai 600 izgleitojamī (itūšaļt RMDV vuicuos 377 audziekni i JIRMV – 246).

LMMV turpynuos eistynuot asūšūs obeju školu profesionaluos izgleiteibys programys i puorjims izgleitojamūs, pedagogus i darbinīkus. Tai kai kotrys izgleiteibys īstuodis telpys ir specifiski pīlāguotys muzykys, muokslys i dizaina izgleiteibys programu eistynuošonai, ari piec apsavīnuošonys plānuots izmontuot obeju školu ākys.

Kab nūdrūsynuotu sekmeigu reorganizacejis procesu, da 1. apreļam Kulturys ministreja izveiduos reorganizacejis komiseju, kurā dorbuosīs obeju školu i KM puorstuovi.

Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]