Nūtiks jau deveitais jaunūs vokalistu konkurss “Skaņais bolss”

Nūtiks jau deveitais jaunūs vokalistu konkurss “Skaņais bolss”

Rokstu sagataveja: portals lakuga.lv

Paradzātuo jaunūs vokalistu konkursa “Skaņais bolss” mierkis ir atteisteit jaunūs dzīduotuoju profesionalū i muokslinīcyskū izaugsmi. Konkursa aizdavumi ir popularizēt akademiskuos muzykys vierteibys, veicynuot pedagogu pīredzis apmaiņu i sekmēt latgalīšu kulturys tradiceju saglobuošonu, viestej Juoņa Ivanova Rēzeknis muzykys vydsškolys sātyslopā daīmamais konkursa nūlykums.

Pyrmais konkurss “Skaņais bolss” nūtyka 2006. godā, taipoš kai tūlaik, tū ari niu organizej Juoņa Ivanova Rēzeknis muzykys vydsškola. Konkursa dalinīki ir Latgolys muzykys školu i vyspuorizgleituojūšūs školu audziekni vacumā nu 7 da 15 godu. Dalinīku dasacejumus var īsnēgt da 24. marta, aizpyldūt anketu ITE. Konkurss nūtiks 2023. gods 4. aprelī Rēzeknis muzykys vydsškolys lelajā zālē.

Svareigi, ka vīns nu konkursa nūsacejumu ir izpiļdeit ari breivi izvālātu latgalīšu tautysdzīsmi. Konkursa žureja dalinīkus viertēs piec itaidu kritereju: vokaluo tehnika, muokslinīcyskais snāgums, kūpīspaids i repertuara atbiļsteiba.

Ituo gods konkursantu repertuars ir taids kai kūpsavylkums nu vysu cytu konkursa godu – kotrs dalinīks atskaņoj obligatū dzīsmi i jam ir vareiba izavielēt sev teikamuokū nu pīduovuotūs dzīšmu saroksta. Kai stuosta vīna nu konkursa organizatoru Guntra Kuzmina-Jukna, vīnai nu dzīšmu ir juobyut nu latgalīšu komponistu repertuara, respektivi, kaidai nu Sandrys Mežoris, Ilonys Rupainis voi Guntrys Kuzminys-Juknys komponātuos dzīšmu, sovpus ūtrei dzīsme ir breivys izvielis tautysdzīsme bez pavadejuma. “Agruok konkurss nūtyka reizi div godūs, tok niu plānojam organizēt kotru godu, partū ka ir lela atsauceiba nu regiona školu, taipoš lela interese ir ari nu cytu nūvodu,” tai Guntra Kuzmina-Jukna.

Kotru konkursa reizi dalinīkim teik paduovynuotys ari gruomotys – konkursa notu kruojumi, i Guntra sūlej, ka taids izdavums byus ari itūgod.

Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]