Kulturys īsacejumi nedeļai: īpazeit tyvuok keramiku i jaunys muokslys izpausmis

Kulturys īsacejumi nedeļai: īpazeit tyvuok keramiku i jaunys muokslys izpausmis

Rokstu sagataveja: portals lakuga.lv

Una Gura ir vīna nu keramiku, kura kasdīnā dorbojās Daugovpiļs Muola muokslys centrā. Par Unu drūsai var saceit – eistyna muokslineica ar sovu unikalū redzīni iz pasauļa lītom. Una pamozam atteista ari sovu keramikys dizaina vierzīni ar nūsaukumu “Pumpunella”, jei ari sūlej, ka vosorā byus kaida jauna vīta, kur braukt pi juos gostūs i sapazeit tyvuok ar keramiku.

Gasteit Daugovpiļs Muola muokslys centrā

Daugovpiļs Muola muokslys centrā var gasteit vasalu piecpušdīni. Muola centrā ir izstuožu zāle, kurā ekspoziceja mainuos ik pa div mieneši. Itūšaļt apsaverama Anatolija Šandurova gleznīceiba izstuodē “Postindustrializācija”. Parosti teik izstuodeiti vysaiduoki muokslys veidi, kai keramika, tai tekstils i amatnīceiba (pynumi, kūkapstruode, audumi i rūkdorbi). Muola centrā ir ari keramiku darbneicys, kur struodoj Tautys lītiškuos muokslys studeja “Latgale” i keramiki Lilija Zeiļa, Juoņs i Marija Saikovski, Nellija Dzalba, es poša, Sandra Poplavska, Ligita Panne, Mairita Folkmane i cyti. Ka muokslinīki ir iz vītys i dorbojās, var apsavērt dorba procesu. Var ari īprīšk pīsaceit personeigū meistarklasi, ar jums dorbuosīs i paleidzēs pīredziejs keramiks i jius varēsit izveiduot sovu keramikys dorbu, kuru apdadzynuos i atdūs jums div nedeļu laikā. Kotru catūrtdīni nu 16 da 18 stuņžu Muola muokslys centrā nūteik ari nūdarbeibys bārnim, īteicamais vacums 6-18 godi. Keramikys centrā var īsaguoduot muokslinīku rodūšūs dorbus i pasyuteit eipašus, sev darynuotus prīškmatus i suvenirus.

Karteņa: Daugovpiļs Muola muokslys centrs. Latgolys Turisma asociacejis arhivs.

Pabyut Albrecht Art&Wine muokslys galerejā

Īsoku koč kod pabyut ari itamā vītā, te ir vareiba baudeit originalūs Portugalis veinus, kuri teik vasti pa taisnū nu ražuotuoja. Barmeņs jums uzjauks sevkuru dzierīni nu “BBC food 10” lobuokūs kokteiļu saroksta. Iedīņu te nav, tok ir vareiba baudeit vysaiduoka veida uzkūdys nu greku sīra i olivu leidz makarūnim i vyrtulim.
Muokslys galerejis interjers ir īkuortuots kai serialā “Tvinpīka” (“Twin Peaks”, eng.). Interjeru dekorej Daugovpiļs muokslinīku i vītys eipašnīka draugu muokslys dorbi. Vīnā nu lūgu ir eksponāta muokslinīka Paula Pudža skulptura “Hiēna”, kurys dieļ 2020. godā lūgs tyka aizkruosuots ar sorkonu kruosu. Muokslys galereja ir taida hedoniska vīta, kur skaņ izmaklāta “funk”, “džeza”, “New Age” muzyka. Muokslys galereja nu 14. janvara ir attaisejuse izstuožu zāli, kur pyrmuo izstuode beja Ksenijis Šinkovskys veiduotī muokslys dorbi veļšonys tehnikā. Izstuožu zālē izstuodis mainuos reizi div nedeļuos, izjāmumu gadīnī var palikt ari vasalu mienesi. Sovpus niu da 11. marta byus vareiba apsavērt zvīdru izceļsmis muokslinīka Henric Johansson daudzdimenseju muokslys skatejumu. Juo gleznuojumi ir pīpiļdeiti ar nūslāpumainom byutnem i nūskaņom.

Karteņa: Unys Gurys arhivs.
Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.