Rokstu sagataveja: portals lakuga.lv

Pīktdiņ, 3. martā, 16.00 stuņdēs Daugovpiļs Marka Rotko muokslys centrā atkluos pavasara izstuožu sezonu ar Daugovpilī dzymušuo pasauļa slavi dabuojušuo muokslinīka Žaka Šapiro dorbu izlasi i vēļ pīcim spylgtim i zeimeigim muokslys projektim, viestej Marka Rotko centra marketinga specialiste Inita Paegle.

Kab drupeit padareitu dreizuoku pavasara īsastuošonu, Rotko centrs apmaklātuojus aicynoj iz pavasara izstuožu sezonys atkluošonu. Itūreiz centraluo izstuode byus veļteita Daugovpilī dzymušuo pasauļa slavi dabuojušuo muokslinīka Žaka Šapiro, eistajā vuordā Jakovs Šapiro, dorbu izlasei. Muokslinīks pīdzyma Krīvejis imperejis Vitebskys gubernis Dinaburgā (niu – Daugovpiļs). 1952. godā jis puorsacēle iz Fraņceju i dasavīnuoja Parizis muokslinīku kolonejai “La Ruche” (“Spīts”), kur 20. godu symta 20.-30. godūs dzeivuoja i struoduoja taidi nuokušī muokslys geneji kai Modiljani, Pikaso, Šagāls i Ležē. Kūpā jī veiduoja tai saucamū Parizis školu, tok taišni Šapiro izadeve radeit pošam sovu naatkuortojamū muokslys pasauli ar naparostom formom i spylgtom kruosom, kas vys vēļ raisa muokslys pazinieju, kolekcionaru i galereju interesi. Rotko centra kūrātuo izstuode “Pārnākšana: Žaks Šapiro” ir topuse sadarbeibā ar muokslys kolekcionaru Šmuelu Tacu (Ņujorka, ASV).

Kasgadeji ari Latgolys regiona muokslinīku konkursa izstuodē pasaruoda jauni muokslinīki, pīsadola ari jau muokslys pasaulī zynomys personeibys. Itūgod izstuodis nūsaukums ir “Trāpīts desmitniekā”, partū ka tei ir dasmytuo ituos izstuodis reize i leidz ar tū teik aizsuokta ari Rotko centra desmit godu jubilejis svieteišona. Konkursa kuorteibā itūgod atlaseiti 48 muokslinīku dorbi, kas piec žurejis viertejuma i bez sevkuru uoreju voi īškeju cenzurys žņaugu ir “truopejuši desmitnīkā”. Itūgod izstuodē caur muokslys dorbim varēs sasatikt ar Agru Ritiņu, Aivaru Buli, Andri Kalininu, Annu Silabramu, Gitu Palmu, Ivo Folkmani, Māri Popovu, Viju Stupāni, Žannu Vērdiņu i cytim.

Vēļ pavasara izstuožu sezonā Rotko centrā varēs īpasazeit ar pūļu muokslinīka Pjotra Skovrona abstrakti reprezentativuos grafikys izstuodi “Interferences”, fotografa i muokslinīka nu Australejis Ralfa Kerlis izstuodi “Netveramais cildenums”, kai ari fraņču fotografa Uriela Morgenšterna daiļradi izstuodē “Par Rotko un Sulāžu: Klusuma krāsa”.

Pavasara izstuožu sezona apmaklātuojim byus daīmama da 21. maja. Izstuožu sezonys atkluošonys pasuokuma laikā nu 16 stuņžu izstuodis varēs apsavērt bez moksys.