Ūgys jaunais videoklips – kriminaluo kina dzīsmei “Biedeigais B”

Ūgys jaunais videoklips – kriminaluo kina dzīsmei “Biedeigais B”

Rokstu sagataveja: portals lakuga.lv

Latgolys hiphopa muzike i apvīneibys “Ausmeņa Records” puorstuove Ūga publiciejuse jaunu videoklipu, kas dzīsmei “Biedeigais B” sataiseits kriminaluos kinys žanrā. Videoklips pyrmizruodi pīdzeivuoja 24. februarī Rēzeknē, Latgolys viestnīceibys GORS kinuteatrī, tok niu tū publiski var nūsavērt kotrys grybātuojs.

Kai portalam lakuga.lv stuosta Ūga (eistajā vuordā Daiga Barkāne), dzīsme “Biedeigais B” ir kai ūtrei daļa skaņdorbam “Nalegalais bizness”, kas publicāts 2022. gods suokumā. “Obejuos dzīsmēs stuosts ir par taidom kriminalom lītom, tik “Biedeigais B” klipam dalykta kluotyn 90. godu “pīgarša”, kab byutu leluoks efekts i radeitu klipa skateituojim ari nostalgejis sajiutu,” soka Ūga. Dzīsmis ideja Ūgai rodusēs nu dzeivis, vārojūt cylvāka-bandita dzeivi i attīceibys ar sīvītem, bet klipā vīna nu sižeta lineju ir par policejis dubultū morali.

Tū, ka vajag taiseit videoklipu taišni kaidai Ūgys dzīsmei, suokūtnejuo ideja bejuse producentei Olgai Bogdanovai, bet taišni kriminaluos kinys žanrys ir klipa režisora Ruslana Fradkina dūma. Ar obejim Ūga īpasazynuse seriala “Fati” fiļmiešonys laikā. “Prīcojūs par breiveibys sajiutu, kū Ruslans kai režisors deve fiļmiešonā, paleidzūt īsajust klipa tālā,” soka Ūga.

Ūga stuosta, ka fiļmiešona bejuse treis dīnys, itūreiz klips taiseits Reigā i tuos apleicīnē. “Saskaiteju, ka fiļmiejom vasaluos desmit vītuos, kas pīdzeivuoja dažaidys puortapšonys, par pīmāru, gostu sātā vīnā stuovā fiļmiejom kuozu ainu, nu pogrobā tamā pošā šaļtī jau beja kazino. Fiļmiejom pi jiurys, iz jumta – dažaiduos vītuos. Taipat vīna nu ainu ir benzintankā, kuru “apzogom”, jī īlaide myus iz puora stuņdem “pasaspieļuot”,” fiļmiešonys procesā īsavērt ļaun Ūga.

Leidza ar Ūgu klipa golvonū lūmu spēlej akters Andrejs Alens, kuru īprīšk poša muzike beja redziejuse viņ ekranā taidūs serialūs kai “Nemīlētie” i “Pazudušās”, bet sadarbeiba bejuse breineiga, akters beja vīnkuoršs, atvārts, atlics tik “turēt leidza”. “Nu fiļmiešonys procesa maņ emocionali vysu gryušuokuo beja dīna ar sautivis ainu. Pyrma tuo ruodejuos, ka tik byus, byus taids draivs, maņ patiks, tok tī iz vītys saprotu, ka tei ir taida atbiļdeiba, nav nikaids jūks – maņ rūkā ir īrūcs, pošai juosaun, pošai juopuorluodej, bet ite ir cylvāki, fiļmiešonys komanda i kotra klaida, kotra napareizi kusteiba var byut beistama. Tuos emocejis vys vaira nagrybātu izjust,” atkluoj Ūga. Osys sajiutys radejuse ari drifta fiļmiešonys aina, kod muzikei vajadzējs tāluot breiveibu, izalīkt pa lūgu, bet eistineibā nu mašynys Ūgys kuojis pīturātys, kab jai tys saītu, kai ari pi ituo vysa vēļ bejs lels sols.

Karteņā: kadrys nu klipa

Ūga atzeist, ka interesanti bejs jom obejom ar aktrisi Kristīni Veinšteinu, kurei klipā tāloj benzintanka puordevieju, vuiceit Andrejam Alenam runuot latgaliski, kab varātu piec īspiejis lobuok paruodeit benzintanka aplaupeišonys ainu. “Izdūmuojom tekstu, Andrejs raudzeja runuot, īsuokumā cīši juka, tok apzineigi vuicejuos i golā saguoja cīši labi!” stuosta Ūga.

Akteru atlase beja producentis i režisora dorbs – leluokuos lūmys uzticātys jau pazeistamim akterim Andrejam Alenam, kai ari Ritvaram Gailumam, Kristīnei Veinšteinai, Vadimam Bogdanovam, kurus napaseņ varēja redzēt ari kriminalajā komedejā “Fati”. Taipat klipā pīsadola akters Rodions Kuzmins, režisors i operators Antons Barons, kai ari hiphopa apvīneibys “Kreisais Krasts” daleibnīki R2RS i Pionieris. Taipat pīsadaleišonai klipa fiļmiešonā beja izsludynuots ari publiskais kastings, kurā varēja pīsadaleit sevkurs grybātuojs.

Iz vaicuojumu, kū vēļ itūgod nu Ūgys gaideit, muzike tik nūsoka: “Byus i koncerti, i jaunys sadarbeibys!”

Print Friendly, PDF & Email

Kalenders

Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]