Rokstu sagataveja: portals lakuga.lv

Latgolys plānuošonys regions izstruoduojs kruosojamū gruomateņu bārnim “Izkrāso Latgali!”, viestej publiski daīmamuo informaceja. Izkruosojūt vysaiduokus objektus, meklejūt vuordus, rysynojūt aizdavumus, bārni varēs īpazeit Latgolys pošvaļdeibys, kurys vysod gaida atsagrīžam sovus dzeivuotuojus nu uorzemu, kai ari gostus.

“Izkrāso Latgali!” ir atrūnams Daugovpiļs cītūksnis, Kruoslovys i Preiļu piļs, Lūznovys muiža, Viļakys bazneica, Rēzeknis i Ludzys piļsdrupys, pīmineklis Latgolys partizanu pulka krytušajim karaveirim “Bolvu Stanislavs”, Muorys pīmineklis, Leivuona stykla i amatnīceibys centrs, Vasargelišku skotu tūrņs.

Kruosojamū gruomateņu sovā kasdīnys dorbā var izmontuot izgleiteibys īstuožu darbinīki kai Latvejā, tai uorvaļstīs (diasporys organizacejis), ari vacuoki – kūpā ar bārnim meklejūt objektus i rysynojūt aizdavumus. Tei dūmuota vysu vacumu bārnim, muotem, tāvim, babom, vactāvim, aukleitem.

Elektroniskū kruosojamuos gruomatenis “Izkrāso Latgali!” verseju var atrast ITE. Tai kluotyn ir sagataveitys ari ilustrātys uzleimis (var atrast ITE), kuruos var izgrīzt, īlepēt lopuos i pošim taiseit dizainu.

Kruosojamuo gruomateņa sataiseita Vidis aizsardzeibys i regionaluos atteisteibys ministrejis prioritaruo pasuokuma 2019.-2021. godam “Diasporas likuma normu īstenošana (Atbalsta pasākums remigrācijas veicināšanai “Reģionālās remigrācijas koordinators”)” laikā. Grafiskū dizainu sagataveja Anna Stalidzāne.