Latvyskuos identitatis nūmetne “3×3” itūgod ari Ludzā i Preiļūs

Latvyskuos identitatis nūmetne “3×3” itūgod ari Ludzā i Preiļūs

Rokstu sagataveja: portals lakuga.lv

Nūmetne “3×3” ir paradzāta vysu paaudžu latvīšim i tuos mierkis ir latvyskūs zynuošonu paplašynuošona, latvyskuos kūpeibys sajiutys veicynuošona, latvyskūs saimu vierteibu styprynuošona i draudzeibys sekmiešona latvīšu storpā. Itūgod “3×3” nūmetne byus ari Ludzā i Preiļūs.

Nūmetnis “3×3” dalinīku vacums ir naīrūbežuots i aptver vysa pasauļa latvīšus nu puors nedeļu da 90 godu vacuma, kuri pīsadola kai individuali, tai i div, i treis saimu vīneibuos. Vīnys nūmetnis garums ir vīna nedeļa, tradicionali nūmetnis programa aptver cīši plašu interešu lūku, suocūt nu viesturis, sabīdriskim vaicuojumim, folklorys, muokslys, literaturys, latvyskom tradicejom i cytom temom.

Itūgod Ludzys nūmetnis vadmotivs byus “Tauta”, kūpeigai tiks meklātys atbiļdis iz svareigim vaicuojumim – kas ir Latvejis tauta, kas asam kotrs pats, kas paleidz vairuot i saglobuot latvyskuos i reizē ari personeiguos tradicejis. Ituo gods Ludzys saīta organizatori ir Bogustovu saime, kuri sūlej, ka saīta laikā byus vareiba vuiceitīs ari daudz praktisku orūdu – keramiku, ausšonu, skaliņu peišonu i sasapazeišonu ar vītejim saiminīkim i lobu dorbu dareituojim. Vaira par saīta programu var dazynuot ITE, sovpus te var apsavērt īvieržu aprokstu i plānuotū dīnys ritmu.

Karteņa: Ludzys “3×3” organizatori Bogustovu saime. Sātyslopys 3×3.lv publicitatis materials.

Sovpus Preiļūs ituo gods nūmetni organizēs Cepļu saime, kuri ir ari daļa nu bīdreibys “Trīs reiz trīs” padūmis. Preiļu nūmetnis vadmotivs byus “myuža ritums”. Kai stuosta Reinis Ceplis, jī nūmetnis organiziešonai dasasacejuši jau 2020. godā, tok pandemeja tūlaik pasuokumu atcāluse. Reinis ari stuosta, ka nūmetnis programys izveidei ir mugorkauļs, kurs īstruoduots godu desmitu garumā. Ir vairuokys vadlinejis, kurys palykušys namaineigys nu nūmetnis iz nūmetni – dīnys ritms, nedelis ritms, nūmetnē vysi cyts cytu vysod uzrunoj iz “tu”, vysi ād kūpeigys iedīņreizis. Kai pastreipoj Reinis: “Nūmetnis mierkis nav “kurorta apmekliejums”, tys ir kulturys, sadzeivis i saimis pīdzeivuojums.” Reinis ari papyldynoj, ka nu Krīvejis pylna mārūga ībrukuma Ukrainā jū eipaši ir juostyprynoj Latvejis Austrumu pīrūbežs, i taišni deļtuo obeji 2023. gods “3×3” saīti nūteik Latgolā. Vaira par “3×3” programu Preiļūs vari skaiteit ITE.

Karteņa: Preiļu “3×3” organizatori Cepļu saime. Sātyslopys 3×3.lv publicitatis materials.

Nūmetne “3×3” tradicionali nūrit nedelis garumā, itūgod Ludzā nu 9. da 16. juļa i Preiļūs nu 23. da 30. juļa. Sevkuram interesentam ir vareiba dasasaceit daleibai, rokstūt motivacejis viestuli iz elektroniskajim postim preili3x3@gmail.com i ludzas3x3@gmail.com.

Print Friendly, PDF & Email

Nūtikšonu kalendars

Mar
29
Tre
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 29 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Mar
30
Cat
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Mar 30 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]