Grupai “Bez PVN” sadarbeiba ar Dionu Liepiņu dzīsmē “Šaļti”

Grupai “Bez PVN” sadarbeiba ar Dionu Liepiņu dzīsmē “Šaļti”

Rokstu sagataveja: portals lakuga.lv

Leidza ar 8. martu nūsaslādz grupys “Bez PVN” kotra mieneša dzīsmis publiciejumi i kai pādejuo niu skaniešonu pīdzeivoj dzīsme “Šaļti”, kurā grupa sasadorboj ar dzīduotuoju Dionu Liepiņu.

“Dzīsme “Šaļti” ir par suokumu. Tod – augšonu, pīaugšonu i saaugšonu kūpā. Iz pavysam…“ tai par jaunuokū skaņdorbu soka dzīsmis vuordu autors Kristaps Rasims. “Mums ir lela prīca sasadorbuot ar Dionu, kuru sovā ziņā varim uzskateit par myusu jaunuokū muosu. Taipat kai i daļa nu grupys “Bez PVN”, ari Diona lelu daļu sova myuža auguse i pīauguse Kuorsovys pusē,” stuosta Kristaps.

Jaunuo dzīduotuoja Diona Liepiņa plotuoku atpazeistameibu dabuoja ar pīsadaleišonu televizejis šovā “X faktors”. Niu juos dzīsmis regulari ir dažaidu Latvejis muzykys topu vydā, bet tikū jei nūslēdze vēļ vīnu karjerys izaicynuojumu – pīsadaleišonu dzīduošonys šovā “Lietuvos balsas” Leitovā.

“Šaļti” muzykys autori ir grupa “Bez PVN”. Dzīsmis videoverseju taisejs Ivars Utināns, bet pi gaismu tolkā guojs Justs Ribinickis. Dzīsme īraksteita studejā “Hodila Records” pi Girta Laumaņa i studejā “Reiga”, bet dzīsmis miksa i mastera apstruodis taisejs Armands Treilihs.

Jaunys dzīsmis publiciešona kotra mieneša 8. datumā suocēs septembrī ar dzīsmi “33”, pasaturpynuoja oktobrī ar “Batuts”, novembrī “Skaidys”, decembrī “Jau ni mes”, janvarī “Plyudi”, februarī “Zalts”, bet jaunuokuo dzīsme “Šaļti” ir jau septeitais publicātais skaņdorbs. Atguodynojam, ka itys vyss nūvess iz grupys jaunuo albuma “Paraleli horizonti” prezentacejis koncertu, kas paradzāts cyta gods 18. martā Latgolys viestnīceibā GORS Rēzeknē. Koncerta beletus var nūpierkt ITE.

Koncertā “Paraleli horizonti” grupa apvīnuos sova jaunuokuo studejis albuma prezentaceju ar dzīšmu vysaida veida interpretacejom. Koncertā uzastuos ari cyti gosti i “Bez PVN” draugi. Jaunajā albumā byus apkūpuotys kovida īrūbežuojumu i sātā siediešonys laikā pīdzymušuos “Bez PVN” dzīsmis. Īprīškejais lelais grupys koncerts taišni Latgolys viestnīceibā GORS izskanēja 2019. goda oktobrī. Tū var nūsavērt ITE.

Grupā “Bez PVN” dorbojās: Kristaps Rasims (bolss, elektriskuo gitara), Guntis Rasims (bolss, akustiskuo gitara), Juris Vucāns (bolss, elektriskuo gitara, tausteni), Valdis Vucāns (basa gitara) i Normans Bārbals (bungys).

Print Friendly, PDF & Email

Kalenders

May
21
Ūtr
15:00 Izstuodis “Juoņs nu Dzeņagola” a... @ Latgolys Kulturviesturis muzejs
Izstuodis “Juoņs nu Dzeņagola” a... @ Latgolys Kulturviesturis muzejs
May 21 @ 15:00 – 16:30
Izstuode byus veļteita muokslinīkam i literatam Juoņam Trūpam (1924-1989), pīmynūt jū symtgadē. Koč i sovys dzeivis leluokū daļu J. Trūps ir pavadejs trymdā, dzeivuodams ASV natuoli nu golvyspiļsātys Vašingtonys, vystik vysu sovu rodūšū darbeibu, breivū[...]