Kulturys īsacejumi nedeļai: svaigs gaiss, gordumi i saktu izstuode
Rokstu sagataveja: portals lakuga.lv
Kulturys īsacejumus itai nedeļai sagatavejuse etnomuzikologe, grupys “Muosys” dalineica Liene Brence. Jei īsoku izīt svaigā gaisā, sataiseit koč kū gordu, kai ari apmeklēt izstuodi Rēzeknis Centralajā bibliotekā.
Baudeit pavasara atīšonu
Pyrmais īsacejums byutu dabraukt da tyvuokuo meža i pasastaiguot, pylnu kryuti elpuot svaigū meža gaisu, baudeit pavasara suokumu i syltū sauleiti!
Sataiseit kū nibejs gordu
Ūtrys īsacejums – pagatavuot koč kū gordu, pīmāram, šokoladis kekseņus ar grauzdātim lozdu rīkstim. Byus šokoladis smarža pa vysu sātu! Itam vysam kluot loba kopeja.
Saktu izstuode Rēzeknē
Īsoku aizīt iz Rēzeknis Centrālū biblioteku, kurā var apsavērt breinumainu, caur godu symtim Latvejis teritorejā veiduotūs rūtu – saktu izstuodi. Kolekcionars Normunds Beržinskis ir izstuodis autors. Juo eipašumā ir 1000 saktu, kurys ir izgatavuotys nu 17. leidz 21. godu symtam.
