Rokstu sagataveja: portals lakuga.lv

Trešdiņ, 22. martā, Vaļsts volūdys centrā ar svineigu laureatu i veicynuošonys bolvu sajiemieju apbolvuošonu nūsaslēdze Vaļsts volūdys centra reikuotuo akceja “Latviešu valodas kvalitāte periodiskajā presē”. Tei veicynoj plošsazinis leidzekļu veiduotuoju i skaiteituoju aktivu īsasaisteišonu volūdys kulturvidis kūpšonā. Veicynuošonys bolvu sajēme ari latgalīšu kulturys ziņu portals lakuga.lv

Akcejis dalinīkus ar uzrunom sveice tīslītu ministre Inese Lībiņa-Egnere, Vaļsts volūdys centra direktors Māris Baltiņš, Latvejis Presis izdevieju asociacejis izpylddirektors i vaļdis prīšksādātuoja vītinīks Guntars Līcis. Centra direktors Māris Baltiņš pasnēdze bolvys tim periodiskuos presis izdavumim, kurūs lītuota kvalitativa latvīšu volūda, kai ari pasnēdze veicynuošonys bolvys akcejis dalinīkim, kas eipašu veikumu deļ beja izapeļnejuši akcejis komisejis lūcekļu atzineibu.

Tieslītu ministre Inese Lībiņa-Egnere saceja: “Skaidra, kvalitativa i reizē boguota latvīšu volūda ir na tik medeju/presis, tok ari juristu instruments, kuru gribim kūpeigai izkūpt i styprynuot. Akcejis “Latviešu valodas kvalitāte periodiskajā presē” laureati i dalinīki ir tī, kas tur itū augstū lateņu i saturu pasnādz augsti profesionalā veidā, tai styprynojūt myusu – latvīšu volūdu.”

Itūgod akcejā pīsadaleja ostoni presis izdavumi i vīns ziņu portals. Tyka nūsaceiti laureati div kategorejuos: regionalūs laikrokstu kategorejā uzvarēja laikroksts “Kurzemnieks”, sovpus specializātūs izdavumu kategorejā – žurnals “Būvinženieris”. Kotrys nu laureatu sajem tīseibys izmontuot zeimynu “Laba valoda”. Sovpus veicynuošonys bolvys dabuoja žurnali “Mājas Viesis” i “Zvaigžņotā Debess”, nacionalais laikroksts “Latvijas Avīze” i latgalīšu kulturys ziņu portals lakuga.lv.

Portala redaktore i korektore Laura Melne tū skaita par cīši lelu atzineibu: “Asam eistyn pagūdynuoti par tik augstu sova dorba nūviertiejumu. Lela prīca, ka ari medejs, kura saturs teik veiduots tikai latgalīšu rokstu volūdā, ir nūpeļnejs atzineibu par lobu latvīšu volūdu. Tys kuortejū reizi atguodynoj, ka latgalīšu rokstu volūda ir latvīšu volūdys sastuovdaļa, kuru ari juokūp i juoturpynoj vuiceitīs vysu myužu.”

Akcejis nūslāguma pasuokuma pīvīnuotuo vierteiba beja vareiba nūsaklauseit Vaļsts volūdys centra Terminologejis i tīseibu aktu tulkuošonys departamenta ekspertu, dalinīku vārtātuoju i Reigys Stradiņa universitatis docentis, Latvejis Universitatis pietneicys Dr. philol. Ditis Liepys prezentacejis par atziņom, pi kurūs tykts viertiešonys gaitā. Centra lingviste Muora Mortuzāne-Muravska īsadzilinuoja ari latgalīšu rokstu volūdys vaicuojumūs.