Rokstu sagataveja: portals lakuga.lv

15. aprelī 12.00 stuņdēs Rakstnīceibys i muzykys muzeja kulturtelpā “Tintnīca” (Pulka īla 8, Reiga) nūtiks gruomotys “Sunāns breiveibā” prezentaceja, iz kurū teik gaideitys saimis ar bārnim.

Pasuokumā byus vareiba sasatikt ar komiksa “Sunāns breiveibā” autorem Lauru Melni i Viviannu Mariu Stanislavsku, kūpā īsavērt gruomotā i nūsaklauseit stuosta fragmentu, tikt pi autoru autografu, klauseitīs bārnu i jaunīšu vokaluos studejis “MOMO” jaunīšu snāgumu, kai ari pīsadaleit rodūšajā darbneicā i sataiseit pošim sovu komiksu gruomateņu.

Itei prezentaceja ir daļa nu Rakstnīceibys i muzykys muzeja pasuokumu cykla “Tintnīca bērniem”.Muzeja izgleitojūšuo dorba i dorba ar apmaklātuojim vadeituoja Liena Šmukste stuosta, ka cykla “Tintnīca bērniem” pasuokumu apmaklātuoji  – leli i mozi – īpazeist, apsaver, kas globojās muzeja kruotivē, sasateik ar kaidu rodūšu personu i poši rodūši dorbojās darbneicuos. Rakstnīceibys i muzykys muzejam ir ari izgleiteibys platforma “Augsim muzejā!”, kur bārnim ir vareiba ari nu sātys īsavērt muzeja boguoteibuos i izzynuot daudz jauna i interesanta.

Bārnim īīšonys moksa ir 2 eiro, pīaugušajim – bez moksys. Īprīšk juopīsasoka ITE. Vaira informacejis par pasuokumu ITE.

“Sunāns breiveibā” ir pyrmuo komiksu gruomota bārnim latgaliski. Tuo golvonais varūņs ir suņs taišni taidā vuordā – Sunāns. Saiminīku dzeivisvītys mainis deļ Sunāns niu spīsts puormeit sev īrostū piļsātys vidi iz Latgolys laukim. Tī jam juosavuica sadzeivuot kai ar dabuotū breiveibū, tai saimisteibys sorgu da ituo – kači. Gruomota dūd vareibu bārnim īpasazeit kai ar myusu dīnu piļsātys, tai lauku dzeivi, mudynuos byut drūsmeigim i sovā vydā draudzeigim. Vaira par gruomotu var izzynuot ITE.

Taipat komiksa “Sunāns breiveibā” teksta autore Laura Melne jaunnedeļ gasteis ari Latgolys bibliotekuos, kab sasatyktu ar pyrmajim gruomotys skaiteituojim. Pyrmūdiņ, 3. aprelī, 12.00 stuņdēs paradzāta sasatikšona Preiļu Golvonajā bibliotekā, bet 6. aprelī 11.00 stuņdēs – Nautrānu pogosta bibliotekā.