Latgolys vacuokuos fotografejis mekliejumi i Kruoslovys symtgade – stuosti žurnala “A12” pavasara numerī
Rokstu sagataveja: portals lakuga.lv
Izguojs žurnala “A12” apreļa/maja numers i tymā var puorskaiteit sarunys ar Latgalīšu kulturys goda bolvys “Boņuks” sajiemieju, fotografu Igoru Pliču, Latgolys viestnīceibys GORS 10 godu jubilejis saruna ar Diānu Zirniņu i Ilonu Rupaini, “Griķu rezidencis” saiminīkim Jūliju i Alekseju Danilinim, arhitektu Didzi Jaunzemu i cytim.
Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce soka: “Stuovūt iz vītys, interesantu i jāgys pylnu pasauli radeit ir gryuts, bet, īmūt iz prīšku, varim maineit, ka na nūteikūšū, tod vysmoz poši sevi. Žurnals “A12” ir atkluojums i cylvāki ceļā iz Latgolu – kaidam bierneibys zemi, cytam izaicynūšys dzeivis kasdīnu.”
Žurnala “A12” apreļa/maja numerī skaitit:
- kinys “Daugavpils – iespēju vai nespēju pilsēta?” autoris Vladislavys Romanovys redzīņs i rysynuojumi problemvaicuojumim Latgolā;
- kū meklej i kaidys atzinis dabuojs forografs Igors Pličs;
- bejušuo vaļstsveira Kazimira Šļakotys prognozis ap Latvejis nuokūtni;
- kū nūzeimoj saslimt ar “GORU” – Diānys Zirninis i Ilonys Rupainis 10 godu pīredze koncertzālis gora uzturiešonā;
- kai lobīkuortuot Latgolu – vidis puormaiņu projektātuojs arhitekts Didzis Jaunzems;
- kas ir Preiļu gidis Irēnys Kjarkužys atškireiguo “rozineite” ekskurseju scenarejā;
- Latgolys “Šveicei” Kruoslovai – opoli 100, Ivara Matisova ceļuojums i cyti stuosti.
Kai īrosts žurnalā “A12” puorskaitoma ari portala lakuga.lv sagataveituo informaceja par jaunumim latgaliskūs gruomotu i muzykys izdavumu laukā, kai ari vysu rokstu vydā ari portala lakuga.lv redakcejis taiseitī stuosti – ar myusu Vladislavu Romanovu sasarunuoja lakuga.lv redaktore Laura Melne, bet ar Drabešu omotu sātys vadeituoju Inesi Ruozi sasarunuoja portala vadeituoja Edeite Husare.
Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.
