Rokstu sagataveja: portals lakuga.lv

“Suocīs nūslāpumainuokais laiks godā – Klusuo nedeļa, kod kotrs asam uzrunuots dziļuok īsavērt sevī, puordūmuot sovys dzeivis kuorteibys i nakuorteibys, jimt rūkā kai gareigu, tai laiceigu slūtu i veikt generalteireišonu dvēselis ustobā, sātā i apkuortnē. Tys vyss juopaveic, kab ir kur deigt jaunim dzeiveibys osnim, kur speiteigi sprauktīs cereibu pumpurim i plaukt smaržeigim mīlesteibys zīdim,” tai īsacejumus itai Leldīnis nedeļai īsuoc Īva Zepa aba Stiernīnis Īva.

Kuopīņs Krystakrūga skotu tūrnī aba da seve

Juosalaiž pa šoseju A12, juonūstuoj kaidi 9 km nu Stiernīnis pyrma gaisa tylta stuovlaukumā i juoizkuop Krystakrūga skotu tūrnī. Voi saullāktā, voi vokorrītā, voi ari dīnys vydā skots iz Teiču pūru aizraun elpu – kaids breinumu breinums ir šei Dīva pasauleite. I tur augšā krystviejūs vajag pasarunuot ar sevi – kas palaižams tukšajā zīmeļu viejā, kas atstuojams zam pūra kryuts, kas jemams leidza jaunam pavasaram.

Olūta iudiņs gareigajam i fiziskajam

Vaci ļauds stuosta, ka Lelajā Catūrgā mute takūšā iudinī juomozgoj – skaistumam i veseleibai. Ir vārts atrast Opuļu svātolūtu 12 km nu Pasīnis, kur pareizticeigī jau vairuok nakai symtu godu pylni ticeibys dūdās svātceļuojumūs piec veseleibys žielesteibom. Eipaši olūta iudini īsoka kai gareiguos, tai fiziskuos redzis uzlobuošonai. Itys nivīnam naškodēs!

Mišs Stiernīnis bazneicā

Leldīnis reitā, kod jau byusim izdzeivuojuši Kristus cīsšonu nūslāpumu i paguliejuši iz vaiga krysta prīškā, izmāzuši sātu i sapūsuši svātkim sevi, tiksimēs 8.00 stuņdēs Stiernīnis bazneicā. Leidz ar dīvnoma zvonim klauseisimēs prīceigū viesti: “Nameklejit dzeivū storp myrušajim. Jys ir Augšamcielīs! Aleluja!”

“Un lai kas byutu reiz bejs, kas puordzeivuots, lai cik ryugta byutu bejuse izgierbšona, šausteišona i pīkolšona krystā myusu personeigajā pīredzē, atļausim sev nūticēt breinumam i atsaļausim sovā dzeivē augšamceltīs jaunam pavasaram,” tai īsacejumus nūslādz Īva.

Portals lakuga.lv mainejs autoris lītuotū ortografeju.