Izsludynuots Pītera Jurciņa pīmiņai veļteitais literatu konkurss
Rokstu sagataveja: portals lakuga.lv
Rēzeknis nūvoda Nautrānu apvīneibys puorvaļde izsludynoj literatu konkursu, kab gūdynuotu izcyluo nūvodnīka, dzejnīka Pītera Jurciņa pīmiņu i turpynuotu jau 2005.godā aizsuoktū konkursa tradiceju, informej apvīneibys puorstuove Inga Vigule.
Pyrmuo Pīterdīna Rogovkā nūtyka 2004. gods 29. junī, sasadorbojūt ar Lauku biblioteku atbolsta fondu i kinorežisoru Juoni Streiču, i aptvēre na tik Latgolu, bet ari cytus Latvejis nūvodus. Tī beja svātki, kurūs ar dzejis skaitejumim pīsadaleja īvārojami latvīšu dzejnīki.
Itūgod konkursa moto ir Pītera Jurciņa vuordi: “Kotrai laimeigai dīnai gon jau ir kaids aizkura dedziejs.”
Konkursā var pīsadaleit kotrys, kurs ir pīrakstejs nūlykumam atbylstūšu, vēļ napublicātu dorbu latgalīšu volūdā. Dorbi tiks vārtāti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursam dorbi juoatsyuta leidz 22. juņam (īskaitūt) pa postu (“Pagastmāja”, Rogovka, Nautrānu pogosts, Rēzeknis nūvods, LV-4652, ar nūruodi “Literatu konkursam”) voi elektroniski (iz e-postu: inga.vigule@rezeknesnovads.lv ), nūruodūt autora vuordu, uzvuordu, telefona numeri, adresu, nūsadorbuošonu.
Konkursa laureatu apbolvuošona nūtiks 2023. gods 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 eiro apmārā, kai arī byus specbolva nu Latgalīšu volūdys, literaturys i kulturviesturis školuotuoju asociacejis par bārnu prozu latgalīšu volūdā.
