Apvīnojūt div školys, tiks izveiduota Latgolys Muzykys i muokslys vydsškola

Apvīnojūt div školys, tiks izveiduota Latgolys Muzykys i muokslys vydsškola

Rokstu sagataveja: portals lakuga.lv

Kab veicynuotu kulturizgleiteibys atteisteibu Rēzeknis piļsātā i vysā Latgolā, vairuotu kulturizgleiteibys prestižu i konkurētspieju, kai ari nūdrūsynuotu efektivu kulturizgleiteibys resursu izmontuošonu, vaļdeiba ituo gods 11. apreļa sēdē nūlēme atbaļsteit Muokslu izgleiteibys kompetencis centra (MIKC) “Latgolys Muzykys i muokslys vydsškola” izveidi, reorganizejūt Rēzeknis Muokslys i dizaina vydsškolu (RMDV) i Juoņa Ivanova Rēzeknis muzykys vydsškolu (JIRMV).

Jaunais izgleiteibys īstuodis nūsaukums veiduots, salīkūt tymā niulejūs izgleiteibys īstuožu darbeibys jūmys. MIKC “Latgolys Muzykys i muokslys vydsškola” paradzāts izveiduot muzykys i muokslys izgleiteibys strukturvīneibys iz asūšūs izgleiteibys īstuožu bāzis, saglobojūt ari viesturiskūs nūsaukumus, tys ir, Juoņa Ivanova Rēzeknis Muzykys škola i Rēzeknis Muokslys i dizaina škola.

Karteņa: Rēzeknis Muokslys i dizaina vydsškola. Publicitatis materials nu Facebook.

“Paradzāts, ka jaunuo vydsškola Latgolā varēs pylnvierteiguok atteisteit metodiskū dorbu i efektivuok izmontuot vysa veida resursus, tymā storpā ari Eiropys Savīneibys fondu finansejumu infrastrukturys moderniziešonai,” tai akcentej kulturys ministrs Nauris Puntulis.

Karteņa: Juoņa Ivanova Rēzeknis muzykys vydsškola. Portala Lakuga.lv arhivs.

Kai stuosta RMDV direktoris vītineica komunikacejis jūmā Madara Bērtiņa, itūšaļt vēļ ir vysā daudz naskaidreibu par vysu apsavīnuošonys procesu, vystik golvonuo nianse, kura varbyut īprīšk cytim lyka sasatraukt – obeju školu telpys i vysu pedagogu dorba vītys tiks saglobuotys. “Mes gastejom ari MIKC “Liepājas Mūzikas, mākslas un dizaina vidusskola”, kab dabuotu jūs niulejū pīredzi sakarā ar apsavīnuošonu, ari jī pīzeist, ka suokums nav vīgls, ir vajadzeigi pat div godi, kab saprostu i īsastruoduotu, tok, koč ari puormainis ir gryutys, tuos vystik ir iz lobu. Kai ituo vuiceibu gods suokuos myus uzrunuoja školys direktore – mes voi nu kreitam iz leju, voi vierzomēs iz regionala kulturys centra izveidi. Cīši svareigi, ka leidz ar MIKC izveidi byus vareiba pīsaisteit ari lelūs Eiropys Savīneibys ERAF infrastrukturys projektus,” tai Madara Bērtiņa.

Sovpus JIRMV direktors Raimonds Arbidāns nu sovys pusis dasoka: “Ari myusu školys pedagogi cīši pozitivi verās iz gaidamajom puormaiņom, kai jau saceits, svareiguokais, ka školys telpys i pedagogu dorbavītys sasagloboj namaineigys, deļtam mes eistyn niu asam pozitivu puormaiņu prīškvokorā. Dorba byus daudz, tok jaunais Muokslu izgleiteibys kompetencis centra nūsaukums mums dūs cytu statusu i ari pošus motivēs augt i atsateiteit, kab styprynuotu vyspuorejū kulturizgleiteibu Latgolā.”

Jaunuo vydsškola atsarass Kulturys ministrejis padūteibā, i tuos izveide paradzāta ar 2023. gods 1. augustu.

Print Friendly, PDF & Email

Kalenders

May
17
Pīk
16:00 12. Storptautyskuo keramikys muo... @ Rotko muzejs
12. Storptautyskuo keramikys muo... @ Rotko muzejs
May 17 @ 16:00 – 18:00
Šudiņ muols apvīnoj pūdnīceibu, dizainu, tieļnīceibu i cytus muokslys medejus. Tikom simpozeja rodūšuos aktivitatis apvīnoj muokslinīkus, kas ar tū struodoj. 12. Storptautyskajā keramikys muokslys simpozejā pīsadaleja Roberts Bučeks (Robert Buček, Čeheja), Ilona Romule (Latveja), Otars[...]
19:00 Izruode “Mantojums” @ Dirty Deal teatro
Izruode “Mantojums” @ Dirty Deal teatro
May 17 @ 19:00 – 20:30
“Mantojums” baļsteits dzejneicys i dramaturgis Annys Belkovskys personeigajā stuostā par jū i juos tāvu, partū muokslineica gryb skateituojus iz izruodi aicynuot ar itaidu viesti: “Kod pyrma diveju godu kūpā ar Jāni i Viesturu suocem dorbu[...]