Koncertā “Celīs, bruoļ!” skanēs latgalīšu muziku sadraudzeiba i jaunys dzīšmu versejis

Koncertā “Celīs, bruoļ!” skanēs latgalīšu muziku sadraudzeiba i jaunys dzīšmu versejis

Rokstu sagataveja: portals lakuga.lv

“Latgalīšu muziku sadraudzeiba” – ar taidu sajiutu trešdiņ, 3. majā, Rēzeknē, Latgolys viestnīceibā GORS, izskanēs koncerts “Celīs, bruoļ!”. Tys reizē byus kai veļtejums 106. godadīnai nu Pyrmuo Latgolys latvīšu kongresa portalam lakuga.lv stuosta koncerta reikuotuoju puorstuovs Guntis Rasims.

Muzykys projekts “Celīs, bruoļ!” roduos 2017. godā, svietejūt Latgolys kongresa symtgadi, kod izguoja svātku albums “Celīs, bruoļ!” ar 12 labi zynomom dzīsmem latgaliski jaunuos aranžejuos i izpiļdejumūs. Itūs godu laikā projektam ir bejuši vairuoki koncerti, nu kurūs leluokais pārn ari taišni Latgolys viestnīceibā GORS. “Cikom byus interese nu cylvāku, tikom itei latgalīšu muziķu sadraudzeiba varēs turpynuotīs,” soka Guntis Rasims.

Koncertā 3. majā pīsadaleis kai jau populari i labi zynomi, tai i vysā jauni dažaidus muzykys stylus puorstuovūši muokslinīki – Jānis Aišpurs (The Sound Poets), Arņs Slobožanins (Dabasu Durovys), Guntis Rasims i Jurs Vucāns (Bez PVN), Jurs Ostrovskis (Dvinskas muzikanti), Oskars Bērziņš (kapela “Augusti”), Jana Dudare i Amanda Lapa (Piparmētra), Ingars Gusāns (Sovvaļnīks), Inga Zeile (Laimas Muzykanti), Vinsents Kūkojs (Trikmīņs), Ūga (Ausmeņa Records), Mārcis Lipskis (Rikši), veiru kors “Graidi” i cyti. Kai nūruoda Rasims, itaida veida koncerts ir loba vareiba dažaidūs muzykys stylūs dzīdūšim latgalīšu muzikim dabuot jaunys emocejis, jaunu pīredzi cytam nu cyta, kai ari vīnkuorši sasadraudzēt i kūpā pasasmīt, jo tys nav viņ koncerts, bet ari mieginuojumu process i ari saziņa sovā vydā komunikacejis teiklu grupuos.

Guntis Rasims izsver, ka kotrys “Celīs, bruoļ!” koncerts ir cytaids: “Kotru reizi ir drupeit cyts dalinīku sastuovs. Taipat kotru reizi mes raugam koč par trešū daļu pamaineit koncerta programu. Latgalīšim ir cīši daudz lobu dzīšmu i melodeju – tuos vysys salikt vīnā koncertā var vareibys. Deļtuo kotrys koncerts ir cytaiduoks.” Itūreiz koncertā klauseituoji varēs dzierdēt kai atmūdys laika himnys “Pīmiņ, bruoļ”, “Skaidra volūda”, tai ari jaunuoku laiku kompozicejis – “Īt muna tauta”, “Screen”, “Pusnakts triādis”, “Tik lānai kai munys dūmys”, “Latgaleite”, taipat i taidys cīši labi zynomuos melodejis kai “Tuoli dzeivoj”, “Rūžeņa”, “Jezups” i cytys.

Koncerts “Celīs, bruoļ!” skanēs 3. majā 19 stuņdēs Latgolys viestnīceibys GORS Lelajā zālē. Beletus, kuri moksoj nu 15,00 da 25,00 € var nūpierkt ITE.

Karteņā: Koncerta “Celīs, bruoļ!” afiša
Print Friendly, PDF & Email

Kalenders

Mar
7
Cat
16:00 Valentina Lukaševiča gruomotys “... @ Latgolys Centraluo biblioteka
Valentina Lukaševiča gruomotys “... @ Latgolys Centraluo biblioteka
Mar 7 @ 16:00 – 17:30
7. martā 16.00 stuņdēs Daugovpilī, Latgolys Centralajā bibliotekā, 2. stuovā (Reigys īlā 22a) nūtiks Valentina Lukaševiča vītu stuostu kruojuma “Dīnvydlatgolys stuosti” prezentaceja i sasatikšona ar autoru. Gruomotys 39 stuostūs autors, ceļojūt na tik telpā, bet[...]