Aicynoj iz puorguojīni pa Kuorsovys viesturis stygom

Aicynoj iz puorguojīni pa Kuorsovys viesturis stygom

Rokstu sagataveja: portals lakuga.lv

Ludzys nūvoda turisma centrs sadarbeibā ar Kuorsovys kulturviesturis centru “Līču mājas” 29. aprelī aicynoj sevkuru pīsavīnuot 17 kilometru garā izzinis pīdzeivuojumā “Kuorsova-Rogu piļskolns-Buozova-Kuorsova”.

Puorguojīņa dalinīki nu 10.00 stuņžu varēs apsavērt kulturviesturis centra pastuoveigū ekspoziceju par Kuorsovys i apleicīnis viesturi, kai ari baļtinavītis Valentīnys Daukstis izstuodi “Valentīnas deči” ar austim celenim nu dzeju i kokoru greidys deču. Sovpus 11.00 suoksīs pats puorguojīņs, izejūt pa Kuorsovys piļsātys vacuokajom īlom, tuoļuok atkluojūt Rogu piļskolnu, kū skaita par Kuorsovys pyrmsuokumu vītu. Itymā pūsmā varēs redzēt ari senejuos ceglu dadzynuotovys škūrstynu, kas vys vēļ līcynoj par varonū ražūtni. Pa lauku celenim puorguojīņa dalinīki tuoļuok īs iz pyrmū dzeļžaceļa lineju Baļtejis vaļstīs Buozovā, kur sasaglobuojuse kai senejuo kūka arhitektura, tai daļa nu viesturiskuos dzeļžaceļa infrastrukturys. Puorguojīņa izskaņā gar Reitupis krostim ceļš vess atpakaļ iz Kuorsovys piļsātu, gar varonajim dīvnomim.

Ludzys nūvoda turisma centra puorstuove Inga Zagorska stuosta, ka kotru godu jī reikuoj vysaiduokus aktivuos atpyutys pasuokumus. “22. aprelī byus velobraucīņs Leidumnīkūs, atkluojūt kai vīnu nu treis jaunūs velomaršrutu, tai turisma sezonu. 20. majā ar myusu pusis puorguojīni Pyldys azars-Nierza, aizasuoks Latgolys puorguojīņu dīnys vysys vosorys garumā vysā Latgolā. Ūtrys itaids pūsms pi myusu byus 19. augustā Pasīne-Vacsloboda. Tī byus puorguojīni vaira nakai 25 km garumā. Iz rudiņa pusi reikuosim pūra guojīņus. Juņs i juļs ir cīši aizpiļdeiti ar vysaidim kulturys pasuokumim, deļtuo vēļ itymūs mienešūs naasam nikuo plānuojuši, tok laiks ruodeis, cik lela byus interese nu Ludzys nūvoda dzeivuotuoju i gostu pusis.” Jei ari nūruoda, ka aktivys ir pošys turisma centra darbineicys kai dorba laikā, veidojūt jaunus maršrutus, tai uorpus tuo.

Iz 29. apreļa puorguojīni leidza juojem iudini, koč kū aizkūžamu i personu aplīcynojūšu dokumentu. Pīsasaceit puorguojīņam var, zvonūt 29327265 (Ludzys TIC) voi 28080712 (Kuorsovys kulturviesturis centrs “Līču mājas”).

Print Friendly, PDF & Email

Nūtikšonu kalendars

Sep
23
Sai
17:00 Postfolklorys grupys “Rikši” uza... @ Muorupe
Postfolklorys grupys “Rikši” uza... @ Muorupe
Sep 23 @ 17:00 – 21:00
Muorupis nūvoda Rudiņa ražys godatiergā byus vareiba satikt kai Muorupis nūvoda mozūs ražuotuojus, amatnīkus i muokslinīkus, tai ari meistarus nu cytu Latvejis nūvodu. Tierdzeņa programu muzykali papyldynuos energiskuos postfolklorys grupys “Rikši” koncerts “Latvju danči” i[...]
19:00 Skeču paruode @ Gaļānu kulturys noms
Skeču paruode @ Gaļānu kulturys noms
Sep 23 @ 19:00 – 23:45
Skeču paruode @ Gaļānu kulturys noms
Sep
24
Svā
all-day Maguonis Boleiko izstuode “Biotops” @ Latgolys viestnīceiba "Gors"
Maguonis Boleiko izstuode “Biotops” @ Latgolys viestnīceiba "Gors"
Sep 24 all-day
Leidz 24. septembram Latgolys viestnīceibys “Gors” Muokslys galerejā tiks eksponāta muokslineicys Maguonis Boleiko izstuode “Biotops”, kas aicynoj muokslys baudeituojus vāruot apbreinojamūs dobys procesus, tuos nabeidzamuos transformacejis formuos, kruosuos i byuteibā. Izstuodē “Biotops” muokslineica izsoka apbreinu[...]