Rokstu sagataveja: portals lakuga.lv

Martā grupa “Bez PVN” aizvadeja dzīšmu albuma “Paraleli horizonti” koncertu Rēzeknē, Latgolys viestnīceibā “Gors”, tok niu grupa reizē ar jaunys dzīsmis publiciešonu izsludynuojuse koncertu ari Reigā – 18. oktobrī koncertzālē “Palladium” – viestej grupys publicātuo informaceja.

Jau īprīšk beja īrosts, ka grupa “Bez PVN”, gaidūt Rēzeknis koncertu, kotru mienesi publicej jaunu dzīsmi. Koč i koncerts garum, tradiceja nanūstuoj i 18. aprelī publicāta dzīsme “Postoruo dīna”. Dzīsmis vuordu autors ir Kristaps Rasims, pi muzykys struoduojuse vysa grupa. Dzīsme īraksteita studejuos “Reiga” i “Hodila Records”, dzīsmis tapšonā paleidzējuši Girts Laumanis i Armands Treilihs.

Reizē ar jaunuokū skaņdorbu grupa izsludynuojuse albuma “Paraleli horizonti” prezentacejis svātku koncertu 18. oktobrī Reigā, koncertzālē “Palladium”. Gaidomais koncerts byus naviņ jaunuo albuma atruodeišona, bet ari dzīšmu vysaida veida interpretaceju izskaniešona. Koncertā gaidomī gosti – “Latgalīšu Reps”, Diona Liepiņa i Valters Pūce. Īīšona koncertā byus nu 19.00. Beletus iz “Paraleli horizonti” prezentacejis svātkim var nūpierkt “Biļešu Paradīze” beletu kasēs i škārsteiklā ITE, cena nu 20,00 da 30,00 eiro (pyrmūs 100 beletu cena 20,00 eiro). Kai poši grupys dalinīki soka, tod grupys jaunais albums “Paraleli horizonti” ir kovida īrūbežuojumu i sātā siediešonys laikā pīdzymušūs “Bez PVN” dzīšmu apkūpuojums.

“Piec “Gora” koncerta saprotom, ka pasuokums īsadeve cīši lobs. Dabuojam pošu golvonū – publikys i muokslinīku kūpeigu muzykaluos energejis spruodzīni. Troki daudzi pozitivu i motivejūšu atsauksmu nu vysu pušu, deļtuo grāks itaidā strēčē nanūspieļuot lelu solokoncertu ari taišni Reigā. Saprūtams, tys byus vysā lels izaicynuojums, tok cytaiž mes najādzam,” portalam lakuga.lv Reigys koncerta ideju komentej grupys puorstuovs Guntis Rasims.

Grupa “Bez PVN” da rudiņa vēļ kaidys uzastuošonys naasūt plānuojuse, tok kotru mienesi turpynuos prīcēt klauseituojus i atbaļsteituojus ar kaidu dzīvuo īroksta dzīsmi nu Latgolys viestnīceibā “Gors” aizvadeituo koncerta.