Kulturys īsacejumi nedeļai: breivdīnuos napalicit sātā! 

Kulturys īsacejumi nedeļai: breivdīnuos napalicit sātā! 

Rokstu sagataveja: portals lakuga.lv

Maja svātki ir na tik laiks, kod varim prīcuotīs i pasasaceit, ka dzeivojam breivā i naatkareigā Latvejā, tok ari atguodynuot sev, ka Latveja suocās myusūs pošūs – sovā sātā (dvorā, muojā) i sovā pogostā. Filologe Kristīne Pokratniece ir sova pogosta patriote, kura aktivi vuoc materialus par Bierzpili, dorbojās latgalīšu kulturys kusteibā “Volūda” i dzīd folklorys kūpā “Ceidari”. Itamā nedeļā Kristīne aicynoj pagasteit Bierzpilī, izpieteit ceļmolu krystus i padoncuot balā.

Atbraucit gostūs iz Bierzpili!

Tys ir pogosts Bolvu nūvodā, kas īsaguļs Lubuona klānu maleņā i globoj sevī daudz breineigu vītu, cylvāku i stuostu. Lai navajadzētu lauzeit golvu, es īsoku dareit tai – uztaisi sātā svīksta maizis, atbrauc pi Raksteņu Daiņa iz “Kolnasātu”, nūpierc juo cīši gorduo kvasa. Mašynu pamet pogosta centrā, pagiun mugursūmu ar pušdīnem i suoc sovu ceļu cauri aizsorgojamūs līpu alejai iz Bieržu bazneicys pusi, apsaver Bieržu kopu kapleicu, kas ir vacuokuo kūka āka Bolvu nūvodā, i Bieržu bazneicu. Tod lai ceļš tevi vad garum Bonifacovys muižai, kurā sovus pādejūs myuža godus nūdzeivuojs zynomuokuo 19. godu symta Latgolys pietnīks Gustavs Mantefeiļs. I niu jau ari Iča suok ruodeit sovus leikumus, ceļš turpynojās iz Solys pusi, kurā vēļ arviņ var apsavērt zemnīku-zvejnīku sātys. Tī nu Solys senkopu skatīņs lidoj iz vysu dabasu pušu – radz pūru, klānus, bazneicys tūrņus i cytu breidi pat ruodīs, ka Īdenis kopu prīdis syuta sveicīni nu sova zvejnīku cīma! 

Skots nu Solys kolna, foto Edīte Husare

Majā otkon izzīd ceļamolu krysti!

Majs ir eipašs mieness Latgolā, vēļ aizviņ globojūt tradiceju – maja dzīduojumus pi krystu. Mani itei tradiceja saista ari nu tautys amatnīceibys i vītejūs ļaužu estetiskuma izpratnis pusis. Pavārojit, cik kotra mūceņa ir atškireiga kermeņa formuos – izmārā, proporcejuos, sejis vaibstūs. Cik atškireiga ir materialu izvēle. Krystus atrassit kai betonā, tai metalā lītus, tai i taiseitus nu kūka. Voi esi aizadūmuojs, kaids mums kotram ruodīs jiedzīņs “šmuks”? 

Mūcenis, foto Kristīne Pokratniece

Nostalgiski padoncuot

Vysubeidzūt – atbraucit iz balu Lozdukolnā, partū ka tī varēs kai izadzīduot, tai sadoncuot kūpā ar grupu “Tranzīts”. Koč i puiši ir nu sābru nūvoda, jī breineigi raksturoj myusu daudzu jauneibys diskoteku laiku. I deļkuo vys tī naatsagrīzt iz laiku? 

Print Friendly, PDF & Email

Kalenders

Apr
18
Cat
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]