Kulturys īsacejumi nedeļai: Muzeju nakts, piļskolni i Preiļu pavasars

Kulturys īsacejumi nedeļai: Muzeju nakts, piļskolni i Preiļu pavasars

Rokstu sagataveja: portals lakuga.lv

Laika viests sūlej, ka itūnedeļ beidzūt par pavasari līcynuos na tik zīdūšī kryumi i saplaukušī kūki, tok ari sylts laiks. Eistais laiks īt dobā, tok nedeļgolā naaizmierst ari par vareibu apmeklēt Muzeju nakti. Tū dareit aicynoj ari ituos nedelis kulturys īsacejumu autore – Preiļu muižys kompleksa i parka vadeituoja Ilona Vilcāne.

Muzeju nakts Gaļānūs ar lauku sajiutu

Itūnedeļ nūteik kasgadejuo Muzeju nakts, partū nūteikti ir juoizmontoj vareiba i 13. majā juosadūd iz muzejim – tyvuokim voi tuoluokim. Muns īsacejums aizbraukt iz kaidu nalelu, da ituo naapmaklātu muzeju uorpus piļsātys, jo tī kai pīvīnuotuo vierteiba kulturys aktivitatem byus pavasareiga lauku nakts atmosfera ar sovom skaņom, smuordim, rosu i dabasim bez piļsātys gaismys pīsārņuojuma. Pīmāram, var dūtīs iz Roberta Mūka muzeju Gaļānūs – i “Pīcu čemodanu stuosts”, i koncerts, i ari vareiba īsasaisteit kūpgleznys i instalacejis radeišonā! Kai nikai – ituo gods Muzeju nakts tema ir taišni “Radeišona”. Tok piec tuo filozofisku dūmu atteisteišonai vīnatnē var izstaiguot Filozofejis stygu pa Gaļānu muižys parku.

Piļskolns datora ekranā i dobā

Pavasarī, pyrma saaug gara zuole i sakuploj vegetaceja, labi saradzami myusu seņču piļskolnu silueti. Pādejā laikā, pasasokūt LIDAR kartem, kas sevkuram daīmamys tīšsaistē, ir atkluota vērtine jaunu piļskolnu, leluokuo daļa nu tūs taišni Latgolā. Partū īsoku LIDAR kartē, pīmāram, ITE, vysapyrma nūviertēt izvālātuo piļskolna reljefu i tod dūtīs vērtīs i kuopt kluotīnē! Eipaši interesanti ir taišni tī, kas dziļuok mežā, jo kai pīvīnuotuo vierteiba ir ari datikšona i tūs atrasšona.

Rušenicys piļskolns. Nu Latvejis Geotelpiskuos informacejis agenturys kartis

Preiļu muižys komplekss i parks pavasarī 

Sovpus iz mīrpylnom pastaigom aicynoj Preiļu muižys komplekss i parks. Maja zīdūņs, ryugtonais īvzīdu aromats, ainova, kas atkluoj kūši zaļū, bet vēļ smolkū lopūtni, atspulgus iudiņūs i, prūtams, muižys laika montuojumu. Piļs cikom kas vēļ apsaverama tik nu uorspusis, tok jau nu 13. maja, kai īrosts, Preiļu viesturis i lītiškuos muokslys muzejs apmaklātuojim attaisa muižys kapelu.

Preiļu muižys kapela. Foto autore: Inese Anina
Print Friendly, PDF & Email

Kalenders

Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]
Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]