Rokstu sagataveja: portals lakuga.lv

Itamā sezonā Raiņa muzejs “Jasmuiža” eipašu viereibu veļtej kuozu temom – tūs tradicejom Latgolā i Raiņa vuoktajim materialim par itim gūdim, informej muzeja puorstuovi. Leidz pat oktobra beigom “Jasmuižā” apsaverama izstuode “Kuozys”, ari itymā nedeļgolā gaidamajā Muzeju naktī apmaklātuoji aicynuoti izzynuot kuozys Latgolā.

Sovulaik tūpūšais dzejnīks Rainis, tūlaik students Jānis Pliekšāns, 19. godu symta 80. godūs, studeju godu breivdīnys pavodūt Juosmuižā, eipaši interesiejīs par latgalīšu kuozom, tūs tradicejom i ritualim. Apceriejumā “Daugavpils apriņķa Višķu pagasta kāzu ieražas” jis pīrakstejs latgalīšu kuozu nūtikšonu i izdareibys, pīvīnojūt nu vītejūs apleicīnis teicieju pīraksteituos apdzīduošonuos dzīsmis.

Izstuodis “Kuozys” vizualuos i satura koncepcejis pamatā izmontuoti kuozu nūtikšonu, tradicejis, ritualus, preceibu zeiliešonu, ticiejumus raksturojūši i asociativi prīškmati, atributi, drēbis, aksesuari, muzykys instrumenti, pyura rūkdorbi, kai ari kartenis. Kuozu temys atkluošonai izstuodē eksponāti materiali nu daudzu muzeju kruojumu, privatpersonu, Juosmuižys katuoļu bazneicys. Eipašī eksponati izstuodē ir 19. g. s. beigu–20. g. s. suoku jaunivis vaiņuki nu Latvejis Etnografiskuo breivdobys muzeja, kuozu kleitys nu muzeju kruojumu i privatpersonu, kai ari veļums, pyura lītys i pyrmuos kuozu nakts kraklys. Izstuode papyldynuota ar video i audio materialim: kuozu i apdzīduošonys dzīsmem folklorys kūpys “Naktineica” izpiļdejumā i pīredzis boguotys kuozu vediejmuotis Annys Punculis (1938) stuostim.

13. majā nu 19.00 stuņžu Raiņa muzejs “Jasmuiža” aicynoj iz Muzeju nakts pasuokumu “Latgale. Kuozys”, kurā byus vareiba kai apsavērt jaunū izstuodi, kas veļteita kuozom Latgolā, tai ari pīsadaleit rodūšajā darbneicā, kas saisteita ar pyura taiseišonu.

Izstuode “Kuozys” byus apsaverama vysu sezonu leidz pat 31. oktobram.