Rokstu sagataveja: portals lakuga.lv

Jau catūrtū reizi Latgalīšu kulturys bīdreiba (LKB) organizej dīnnakts nūmetni “Sūpluok”, kurys dalinīku vacums ir nu 14 da 18 godu. Plānuots, ka nūmetne nūtiks nu 7. da 13. augusta Rēzeknis nūvoda Rogovkā, viestej Latgalīšu kulturys bīdreibys publicātuo informaceja.

Pusaudžu i jaunīšu nūmetne “Sūpluok”, kurys nūtikšonu itūgod atbolsta Eiropys Savīneiba, ir veiduota ar mierki izdzeivuot latgaliskuos tradicejis, kasdīnā lītojūt latgalīšu volūdu i veidojūt myusu dīnu jaunīša stuostu par Latgolu. Kai viestej LKB puorstuovi, nūmetnis saturs teik plānuots leidzeigai kai cytus godus – izgleitojūšys nūdarbeibys (sarunys, improvizacejis, spēlis, mikro lauka pietejumi, rodūšuos i aktivuos atpyutys darbneicys), tiks runuots par Latgolys viesturis pagrīzīņa punktim, kūpta personeiguo identitate, vaicuotys sovys saknis, konstruejūt dzymtys stuostu car vysaidom volūdom, augim, kulinarejis tradicejom, senejom kaitom i daņčim, etniskajim prīškmatim. Nūmetnis gaitā sevkuram dalinīkam byus vareiba sataiseit sovu dzymtys stuostu, tok, īspiejams, drupeit atškireigā formā, kai par tū īrosts dūmuot. Dzymtys stuostus plānuots apvīnuot ceļojūšā izstuodē, tai pasadolūt sovā pīredzē ar cytym vīnaudžim.

Kai sevkuru cytu godu, ari itūgod nūmetnē gostūs tiks gaideiti dalinīku saimu puorstuovi kai pīsadaleišonai jau īrostajā intelektualajā orientiešonuos spēlē, tai meistarklasēs, nūdūdūt nūmetnis laikā īvuiceituos prasmis vacuokim. Itūreiz “Sūpluok” dalinīkim byus vareiba pīsadaleit ari Andrejdīnys literari muzykalajā pasuokumā Rēzeknis nūvoda Lūznovys muižā 30. novembrī.

Kab dasasaceitu nūmetnei, juoizstruodoj nalelu dasacejuma (konkursa) dorbu. Nūsacejumi ir diveji: 1) juoizveidoj rodūšs dorbs “Munys saimis (dzymtys) vizitkarte”; 2) juoizalosa izpiļdejuma tehnika: zeimiejums, kolaža, fotografeja, plakats, instalaceja i tt.). Dorbu (ci tuo fotografeju) juoīsyuta da 15. juņa iz e-postu: supluok@gmail.com (juonūruoda sovs vuords, pavuorde, vacums i e-posts).

Dalinīku skaits nūmetnē ir īrūbežuots, partū pretendenti teik aicynuoti naatlikt dorbu īsyutiešonu iz pādejū datumu. Prioritari tiks uzjimti tī dalinīki, kuri sātā kasdīnā lītoj vysmoz divejis volūdys. Kūpejuos izmoksys vīnam dalinīkam ir 340 eiro, nu kuru saimis puorstuovu (vacuoku) leidzmoksuojums ir 94 eiro.