Vosorys beiguos Rēzeknē izskanēs lelkoncerts “Dzimis Latgolā”

Vosorys beiguos Rēzeknē izskanēs lelkoncerts “Dzimis Latgolā”

Rokstu sagataveja: portals lakuga.lv

Populari muziki vosorys izskaņā aicynoj iz lela mārūga sasadzīduošonys svātkim Rēzeknē, tai viestej producents Sandis Mohovikovs. 25. augustā 20.00 stuņdēs Rēzeknis Kulturys i atpyutys parkā nūtiks lelkoncerts “Dzimis Latgolā”, kurā pīsadaleis Latgolā labi zynomi popularuos, tautys i šlagermuzykys puorstuovi.

Koncerta organizatori sūlej, ka skateituojus tymā uzrunuos vitalitate, jūki, vysim zynomys i īmeiļuotys dzīsmis, kai ari patīsa i gūdeiga mīlesteiba pret Latgolu. Par tū pasaryupēs grupys “Dabasu Durovys”, “Borowa MC”, “Latgalīšu reps”, “Liepavots”, “Ginc un Es”, dzīdūšuos Tihovsku i Igauņu saimis, “Baltie lāči”, dzīduotuojs Dainis Skutelis, Jurs Ostrovskis i cyti muokslinīki.

Grupys “Borowa Mc” liders Aigars Runčis soka: “Koncertā spielēsim sovys lobuokuos dzīsmis i leluokūs hitus, kai ari byus dažys jaunys dzīsmis, kas izdūtys naseņ voi pat vēļ tik gaida sovu īpasazeišonu ar publiku. Kluotyn vēļ Rēzeknis koncerti vysod ir bejuši cīši jaudeigi i emocionali, taidu pošu redziešonūs otkon plānojam ari itūgod! Koč i vysa vosora mums vēļ prīškā, jau niu gaidom i dūmojam par augustu!”

Koncertā pīsadaleis ari Tihovsku saime, kurys puorstuove Dace Tihovska stuosts: “Prūtams, itymā vokorā izdzīduosim skaistuokuos tautysdzīsmis! Smeļsim dzīšmu spāku i prīcu, cīnejūt i gūdynojūt tautyskuos vierteibys!” Sovpus Igauņu saime soka: “Aicynojam iz koncertu, kab kūpā ar Igauņu saimi sadzīduotu kai “Rūžeņu”, tai “Kādā lietainā dienā”, tai ari sadoncuotu polku i ”Aņeitis vaļsi”! Kūpā byus ļusteiguok!”

“Muzyka ir nabeidzama i naizsmeļama emoceju i skaņu kombinaceja. Nūvielejam itymā vokorā kotram atrast sovu kombinaceju,” pastreipoj grupa “Dabasu Durovys”, kas koncertā sūlej klauseituojus īprīcynuot ar dzīsmem nu tūpūšuo albuma “Dīnys i Nadīnys”.

Piec koncerta paradzātys dejis lobuokajuos vosarys baļļu tradicejuos.

Print Friendly, PDF & Email