Muziks Andris Baltacis, muokslinīks Kristaps Epners i Nautrānu pogosta vītvuordi – vosorys stuosti žurnalā “A12”
Rokstu sagataveja: portals lakuga.lv
Izguojs žurnala “A12” juņa/juļa numers i tymā var puorskaiteit sarunys ar muziki Andri Baltaci, muokslinīku Kristapu Epneru, keramiki Talitu Tipuku-Romančuku, jaunū literatu Dāvidu Rubenu, školuotuoju i režisori Mariku Čerņavsku, uzjiemieju Olegu Burinski, ainavu arhitekti Annu Koniševu i cytim.
Žurnals “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka, ka ituos reizis žurnala stuostu varūni dzeivē puorbaudeituos vierteibys – dorbuotīs ar jāgu i prīcu, nadzeivuot bez mīlesteibys – ir atkluojuši i apstyprynuojuši sovā dzeivis guojumā.
Žurnala “A12” juņa/juļa numerī skaitit:
- kas ir Nautrānu pogosta vītvuordu nūsaukumu pamatā;
- kū, īkuortojūt vidi, vysā navajadzātu dareit – ainovu arhitektis Annys Koniševys īsacejumi;
- kai tope muokslinīka Kristapa Epnera dorbs “Maslova” i kam tys ir veļteits;
- keramikis Talitys Tipukys-Romančukys ceļš iz Latgolu i magiskī muola trauki;
- kai tehnologeju laikā saglobuot sevi, tradicejis i pīdareibu laukim – saruna ar Valiju Vaivodi nu Preiļu nūvoda partnereibys;
- latgalīšim ir mozuok juočeikst i vaira juodora – atkluota saruna ar muziki Andri Baltaci;
- kū nūzeimoj paust nūstuoju pret karu Ukrainā – interveja ar uzjiemieju Daugovpilī Olegu Burinski;
- izbraucīņs ar laivu pa Rēzeknis upi – Ivara Matisova nūvāruojumu pīzeimis i cytus stuostus.
Kai īrosts žurnalā “A12” puorskaitoma ari portala lakuga.lv sagataveituo informaceja par jaunumim latgaliskūs gruomotu i muzykys izdavumu laukā, kai ari vysu rokstu vydā ari portala lakuga.lv redakcejis komandys taiseitī stuosti – itūreiz par Nautrānu pogosta vītvuordim roksta i ar muokslinīku Kristapu Epneru sasarunoj lakuga.lv redaktore Laura Melne.
Žurnals “A12” ir vareiba izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.
