Muosu Dimantu jaunajā albumā skaņ ari bierneibā nu Margaritys Šakinys īsavuiceituo dzīsme

Muosu Dimantu jaunajā albumā skaņ ari bierneibā nu Margaritys Šakinys īsavuiceituo dzīsme

Rokstu sagataveja: Edeite Husare, portals lakuga.lv

Pošā juņa suokumā Juoņa dīnys programu ar dzīsmem digitalā albumā “Celies, Jāņa diena!” izdavušys Laima i Katrīna Dimantys aba “Māsas Dimantas”. Albuma dzīšmu vydā ir ari vīns bolss nu Līpnys, kuru muosys sovulaik īsavuicejušys nu slovonuos teiciejis Margaritys Šakinys (1926–2014).

Juoņa dīnys svātku programā “Celies, Jāņa diena!” īkļautys 11 dzīsmis. Itei programa rodusēs daudzu godu garumā, pylnveidojūt programu koncertūs kai tepat Latvejā, tai cytuos vītuos pasaulī, i tuos vydā ir kai muosu meiluokuos dzīsmis, tai ari sasadzīduošonys, sasadoncuošonys i rūtaļu elementi. Albums īraksteits kūpā ar muzikim, ar kurim muosys Dimantys muzicej kūpā daudzus godus – ar Matīsu Uškānu pi sytamūs instrumentu, gitaristu Armandu Varslavānu, basgitaristu Kristapu Strodu i akordeonistu Rolandu Zelču. Vysi muosu pavodūšuo sastuova muziki īt nu Latgolys – Matīss, Armands i Kristaps sovulaik sasatykuši jau školys laikā Daugovpilī, bet Rolands ir nu Bolvu nūvoda, nu kuruo īt ari Laimys i Katrīnys mamys saknis.

Vysu albuma dzīšmu vydā vīna ir ari latgaliski – Līpnys leigū bolss “Uordet, meitas, bīži soudus” aba albumā atrūnams kai “A ordit – Liepnas līgo balss”. Kai portalam lakuga.lv stuosta muzike Laima Dimanta, dzīsme īt nu vītys, nu kuruos ir ari muosu vacvacvacmama. “Myusu tāvs ir nu Kūknesis pusis, bet vactāvs nu mamys pusis ir nu Bolvu pusis, bet mama nu Līpnys. Pošys, īkļaunūt itū dzīsmi sovā programā, izjiutam tū kai cīši eipašu, skaistu dzīsmi, kai sovys dzymtys piecteceibys montuojumu. Vyss albums “Celies, Jāņa diena!” rodīs, pasasokūt myusu latvīteibai, muzykys, folklorys, cylvāku i svātku mīlesteibai. Tys ir kai veļtejums svātkim, kurus gaidim ilgi pyrma tī ir atguojuši i svietejam ar prīcu, rūtaļom i dzīsmem, cereibu sirdī, ticeibu gaismai i gaišajam. Itī svātki tūp ar tyvuokūs paleidzeibu – kūpeigū dorbu pyrma, dyžanu sviniešonu piec tam i tys vyss ir dzierdams ari Līpnys leigū bolsā: na viņ muosa vīna poša struodoj, bet ari bruoļs īt paleigūs. Tei ir atguodynuojums ari mums, ka zeme ir myužeiga, bet myusu, cylvāku, myužs taids eislaiceigs,” soka Laima.

Taipat Laima atkluoj, ka dzīsmi sovulaik bejuse vareiba īsavuiceit nu slovonuos Latgolys teiciejis Margaritys Šakinys, kod kai mozys meitinis ar muosu braukušys leidza mamai pi Margaritys iz Ūgri, kur jai reizi nu reizis paleigūs braukuse jūs mama. “Es beju drupeit vacuoka – mani interesēja dzīsmis, ar cīnu klausejūs, bet, saprūtams, kai jau bārnam šaļtim beja garlaiceigi, tok niu, atsaverūt iz tū laiku, vairuokys dzīsmis sovā repertuarā asam dabuojušys taišni, pasasokūt itom sasatikšonys reizem ar Margaritu. Tei ir taida prīca, kas rūnās, kod tu izaudz i drupeit vaira saprūti, sajiuti muzyku. Deļtuo ite dzīsme mums ir cīši personeiga,” ar dzīsmis stuostu pasadola Laima Dimanta.

Muosys Dimantys pādejūs sešus godus Juoņa dīnys laikā koncertējušys uorzemēs, bet šūgod muzikis ir prīceigys, ka byus Latvejā i junī īplānuots cīši daudzi koncertu. Laima soka: “Latgolā vys cikom da Juoņu nivīna koncerta nav plānūs, bet myusu puiši smejās, ka byutu gotovi kaidai izcyli lobai nūtikšonai Latgolā 20. junī, jo tys mums niu ir vīneigais breivais datums itymā laikā. Bet cytaiž ar prīcu koncertejam, braucam gostūs i sasadorbojam ar Latgolys draugim nu Upeitis i Daugovpiļs.”

Jaunū albumu var nūsaklauseit popularuokajuos muzykys straumiešonys vītnēs, i sovim klauseituojim Latgolā muosys Dimantys vielej svieteit svātkūs, prīcuotīs, dzīduot leidza nu sirds, kustētīs muzykys rytmā, sajust prīcu, gaišumu i kūpā byušonu – kai ar dobu, tai vīnam ar ūtru.

Print Friendly, PDF & Email

Kalenders

Apr
19
Pīk
19:00 Grupys “Galaktika” albuma prezen... @ Ludzys tautys noms
Grupys “Galaktika” albuma prezen... @ Ludzys tautys noms
Apr 19 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]