Latgolys stuostnīku festivals “Omotu stuosti” itūgod byus veļteits vacticeibnīku kulturai

Latgolys stuostnīku festivals “Omotu stuosti” itūgod byus veļteits vacticeibnīku kulturai

Rokstu sagataveja: portals lakuga.lv

4. i 5. augustā Augšdaugovys nūvoda Naujinis i Vyšku pogostā nūtiks VIII Latgolys stuostnīku festivals “Omotu stuosti”. Kai informej tuo organizatori, itūgod festivala vierstema ir “Vacticeibnīku goreiguo i sadzeivis kultura Latvejis kulturys kontekstā”.

Latgolys stuostnīku festivali “Omotu stuosti” ir eipaši ar senejūs omotu īdzeivynuošonys tradicejom, kotru godu pīsavieršūt kaidam nu tūs (pūdnīki, bitinīki, kuozu saimineicys, pinieji, audieji, stykla pyutieji, uodys apstruodis meistari), apzynojūt vēļ asūšūs omota meistarus, taisūt meistarklasis, pylnveidojūt stuostnīka prasmis i dziļuok īsaverūt latgaliskajā dzeivisziņā.

Ituo gods festivals dūs vareibu īpazeit Latgolys vacticeibnīku kūpīnys goreigū dzeivisziņu, senejūs omotus, sadzeivis tradicejis i kulturys nūtikšonys. Pietnīku lasejumi, kūpīnys puorstuovu meistardarbneicys, folklorys kūpu aktivitatis i stuosti ļaus dziļuok izprast vacticeibnīku kūpīnys lūmu Latgolys kulturā i sadzeivē, izceļūt Latgolys multikulturaluos vidis boguoteibys.

Festivala atkluošonys pasuokums i dīnys nūtikšonys tiks aizvadeits Naujinis pogosta Sluciškuos, kur atsarūn Naujinis Nūvodpietnīceibys muzeja “Upānu” i “Slucišku vacticeibnīku sātys” ekspozicejis. Sovpus festivala vokora aktivitatis suoksīs ar Daniševkys vacticeibnīku lyugšonu noma apmekliejumu Vyšku pogostā i lelū stuostu vokoru Špogu Muzykys i muokslys školā. Festivala ūtruos dīnys nūtikšonys paradzātys Naujinis Nūvodpietnīceibys muzejā, īpazeistūt vacticeibnīku dzeivis stuostus i vītejū kulturvidi vysaidu atminis instituceju kruojumūs.

VIII stuostnīku festivalā aicynuoti pīsadaleit UNESCO teikla “Stāstu bibliotēkas” daleibnīki i stuostnīki, Latvejis Stuostnīku asociacejis bīdri, cytu projektu i kūpu stuostnīki nu vysu Latvejis regionu. Festivala eipašī gosti byus Latvejis Universitatis Filozofejis i sociologejis instituta vodūšuo pietneica Nadežda Pazuhina, Daugovpiļs Universitatis Mutvuordu viesturis centra vadeituoja profesore Irēna Saleniece, vacticeibnīku kulturys pietneica Ina Kirničanska.

Festivalu, pasasokūt Vaļsts kulturkapitala fonda atbaļsteitajam projektam “VIII Latgales stāstnieku festivāls “Omotu stuosti””, reikoj Augšdaugovys nūvoda Kulturys puorvaļde (Naujinis Nūvodpietnīceibys muzejs) sadarbeibā ar Daugovpiļs Universitatis Mutvuordu viesturis centru, krīvu folklorys studejis ansambli “Iļjinskaja pjatnica”, Naujinis kulturys centru, Špogu Muzykys i muokslys školu, vītejim amatnīkim, stuostnīkim i uzjiemiejim.

Projekta laikā sataiseita Naujinis Nūvodpietnīceibys muzeja breivdobys izstuode “Cilvēku un lietu stāsti”, kura jau ir apsaverama “Upānu” sātys pogolmā Sluciškuos. Izstuodis stuostus veidoj muzeja mutvuordu dzeivis stuostu kolekcejis materiali, kuri atspīgeļoj Augšdaugovys nūvoda vacticeibnīku kasdīnu i dzeivis pīredzi. Stuosti ītver tradicejis, kulturys pīredzi, volūdu i dzeivis izjiutu cylvāka, saimis, dzymtys, rodu, sova cīma i nūvoda rūbežūs. Taišni cylvāka dzeivis stuosts kai viesturis olūts vysprecizuok atkluoj sova laikmata vysaidys škautnis i pīškir personisku, dzili niansātu, smolku emocionalū raksturuojumu. Izstuodē tū akcentej ari teicieju teksti originalvolūdā, saglobojūt vacticeibnīku kulturai rakstureigū izteiksmis formu i sovpateibys.

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]