Rokstu sagataveja: portals lakuga.lv

Nedeļā, kod svietejam vosorys saulgrīžus i Juoņa dīnu, ar īsacejumim, kū pīdzeivuot šūnedeļ, asam acynuojuši pasadaleit Ilzi Mežnieci nu Augšdaugovys nūvoda Ambeļu. Ilze ir dzīduotuoja, muzykante, bīdreibys “Kulturys studeja Speiga” vadeituoja i permakulturys festivalu reikuotuoja.

Aicynojūt ļautīs svātku laikam, Ilze soka: “Itei nedeļa – saulgrīžu nedeļa. Pruots i sirds pylni ar Sauli i Juoņa dīna kai deveitais viļņs tevi tyuleņ apraks i īraus dzelmē, kur mutuļu mutulim grīzs tevi bez apjāgys, kur viersa, kur apakša, zyli-zaļus breinumus gar ocu nierbynojūt, i ceri, ka da svātdīnei tev tiks spāka apjaust, iz kuru pusi Pasauļam juorypoj ci iz kuru pusi jis juorypynoj, kab car mutulim sovys golvys izbuozt jau jaunajā, piec-Juoņa-dīnys-kasdīneigā dzeivē…”

 Svietej sovu vysu breineiguokū Juoņa dīnu Latgolā!

…kod kūrsi guni i īdzīduosi, skandynuosi, trycynuosi pasauli vysapleik…

…kod sasadūsi rūkuos, skrīsi apleik guņkuram, īgrīssi vaiņuku svīžūt, lēksi car līsmem…

…kod reibynuosi bungys, nūreibsi nu zuoļu smuorda, rypuosi nu kolna i naatrassi papardis zīda…

…kod mitiskais ūzuls nu tovys guņs, tovu sadūtūs rūku, tovu dzīsmē vibrejūšūs kryušu augs leluoks i leluoks da dabasu, zam sovu zoru sorgojūt vysu tovu pasauli…

…kod gaismai austūt, kuopsi rosā, ci jiurā, ci azarā i mozguosi skaidrys acs, skaidru sirdi, skaidru sevi, kab sveicynuotu Sauli ar teiru dvēseli…

Saulgrīžu svieteišona Ambeļu kolnā kūpā ar “Speigu” 21. junī

Tu tikai pajem leidza prīcu! I kuop kolnā vērtīs skaistuokuos Saulis nūsalaisšonys kūpā ar folklorys kūpom “Speiga” i “Prymačkys”, kai ari vasalu viertini lobu ļaužu. Ka gribi dareit, dzīduot, sajust, byut KŪPĀ, tod Ambeļūs ir eistuo vīta svieteit goda eisuokū nakti i naļaut gaismai gaist da pat pyrmūs Saulis spaitu. Sasadzīduot ar vysim, sasadancuot ar “Speigu”, Aņsi i “Jumeiti” i izturēt nu vokora deveņu da pat gaismeņai. “Speiga” aicynoj dasavīnuot Saulgrīžu svieteišonai Ambeļu “Skreinē” i kūpā īt apleik myusu dagtam guņkuram 21. junī Ambeļu kolnā. Vysim tiks vītys i draudzeigys rūkys!

Īleiguošona i π-dzīduošona Upeitē 22. junī

Upeitis Galaktikā vajag lekt iz reizi ar obeju kuoju i acs turēt plati valie, i auss taipat! Tu nazyni Latgolu, ka naesi bejs Upītie. Jī runoj na kai ļauds (ite mes nu Dīnavydlatgolys tī eistynī!), guodoj vysā ūtraiži, i jūs var tik meiļuot ci “bēdz tuoli i naatsaver”. Tī, kurim ir dyuša – pavysam cytaida Juoņa dīna tevi gaideis Upeitē 22. junī, kur piec “Īleiguošonys” tevi sagaida NAZKAS, kū upeitīši ir definiejuši kai π-dzīduošonu. Nav skaidruojuma. Nav komentaru. Nav vodlineju. Acs plotai vaļā i lēc vydā ar obeju kuoju!