Rokstu sagataveja: portals lakuga.lv

“Itei nedeļa nu Juoņu da Pīteru golvonūkuort saistuos ar gataveišonūs Dzīšmu i deju svātkim. Tam vysam pa vydu ir ari cytys nūtikšonys, kuruos var i bolsu īskandynuot, i kuojis pakustynuot,” tai ituos nedelis kulturys īsacejumus pīsoka Rēzeknis nūvoda Nautrānu apvīneibys kulturys pasuokumu organizatoru vadeituoja Inga Vigule.

Pīterdīna Rogovkā

“Pīterdīna Rogovkā” ir namaineiga tradiceja jau 19 godu. Vyss suoksīs ar pīminis breidi Desetnīku kopūs pi Pītera Jurciņa atdusys vītys, tod turpynuosīs ar koncertu Nautrānu sporta hallē – KN Rogovkā. Itūgod Pīterdīna tiks svieteita ar jūkim i ļustem – gasteis stuostnīki (Krapacu Ļuce, Cybuļu Jurs i Krakopu Zintis) i folklorys kūpa “Upīte”. Kuoju izkustynuošona garantāta i smīklu deva, kas tik cīši napīcīšama, ari. Nūtiks ari literatu konkursa nūslāgums, kod tiks gūdynuoti lobuokūs dorbu autori – byus īspieja īpasazeit ar latgaliski rokstūšim literatim i jūs dorbim.

Velo foto orientiešonuos pūsmys Rēzeknē

Breineiga īspieja īraudzeit Rēzekni nu jauna i patrenēt kuojis! Pateikamais ar lītdereigū – i pasameit ar velosipedu, i apceļuot Rēzekni. Kod byus īmieginuoti spāki Rēzeknis pūsmā, var dūtīs ari iz cytom piļsātom i īpazeit ari tuos!

Puorsaklauseit folklorys kūpys “Upīte” Juoņu dzīsmis

Īskandynojūt bolsus Dzīšmu i deju svātkim i vodūt itū nedeļu saulgrīžu nūskaņuos, der pasaklauseit i dzīduot leidza vacom – jaunom dzīsmem, kas īt nu Upītis. Klausomēs i baudom sauli, dzīšmu spāku i seņču montuojumu!